ലോഡ്​ ഇറക്കുന്നതിനിടെ ടിപ്പർലോറിയുടെ ഡോർ തലയിലിടിച്ച്​​ ഉടമക്ക്​ ദാരുണാന്ത്യം

ആലപ്പുഴ:​ ലോഡ്​ ഇറക്കുന്നതിനിടെ ടിപ്പർലോറിയുടെ പിൻവശത്തെ ഡോർ തലയിലിടിച്ച്​​ ഉടമക്ക്​ ദാരുണാന്ത്യം.​ മണ്ണഞ്ചേരി പൊന്നാട്​ വാഴയിൽ മൈതീൻ കുഞ്ഞ്​ മേത്തർ (മണിയുടെ) മകൻ താജുദ്ദീൻ (50) ആണ്​ മരിച്ചത്​. തിങ്കളാഴ്ച രാവിലെ 8.30ന്​​ ആലപ്പുഴ ബീച്ചിലെ വിജയ്​ പാർക്കിനു സമീപമായിരുന്നു അപകടം.

ലോഡ്​ ഇറക്കുന്നതിനിടെ പിൻവശത്തെ ഡോർ തനിയെ തുറന്നില്ല. തുടർന്ന്​ ജെ.സി.ബി ഉപയോഗിച്ച്​ തുറന്ന്​ ലോഡ്​ ഇറക്കി. ഇതിനിടെ ലോഡ്​ പൂർണമായും ഇറങ്ങിയോയെന്ന്​ പരിശോധിക്കുന്നതിനിടെ താജുദ്ദീന്‍റെ തലയിലേക്ക്​ ഡോർ വന്നിടിക്കുകയായിരുന്നു.

ജില്ല ജനറൽ ആശുപത്രിയിൽ എത്തിച്ചെങ്കിലും മരിച്ചു. മൃതദേഹം ആലപ്പുഴ മെഡിക്കൽ കോളജ് ആശുപത്രിയിൽ.

മാതാവ്: പരേതയായ ബീവി കുഞ്ഞ്. ഭാര്യ:ഷമി. മക്കൾ: ആഷിഖ്, ഹുസൈൻ, ഇഹ്സാൻ.