ഇനി പ്രകൃതി ദുരന്ത സാധ്യതാ മുന്നറിയിപ്പുകൾ തത്സമയം അറിയാം...

തിരുവനന്തപുരം: കനത്ത മഴയും കാറ്റും പേമാരിയും പോലുള്ള ദുരന്തസാധ്യതാ മുന്നറിയിപ്പുകൾ തത്സമയം പ്രാദേശികമായി എസ്.എം.എസ്, മൊബൈൽ ആപ്ലിക്കേഷൻ, വെബ് പോർട്ടൽ തുടങ്ങിയ വഴിയെല്ലാം ആ ലൊക്കേഷനിലുള്ളവർക്കു ലഭിക്കുന്ന സംവിധാനം കേരളത്തിലും വ്യാപകമായി പ്രവർത്തിച്ചുതുടങ്ങി.

കോഴിക്കോട്ടെയോ കൊച്ചിയിലെയോ തിരുവനന്തപുരത്തെയോ നഗരങ്ങളിലെ പ്രത്യേക മേഖലയിൽ കനത്ത മഴ ലഭിക്കുമെന്ന മുന്നറിയിപ്പുകൾ ആ പ്രദേശത്തുള്ള പരമാവധി ആളുകളെയും അറിയിക്കുന്ന സംവിധാനമാണിത്. ദേശീയ ദുരന്തനിവാരണ അതോറിറ്റിയുമായി സഹകരിച്ച് സംസ്ഥാന ദുരന്തനിവാരണ അതോറിറ്റിയാണ് നടപ്പാക്കുന്നത്.

മൊബൈൽ സേവനദാതാക്കളാണ് ഒരു പ്രത്യേക ലൊക്കേഷനിലുള്ള ഐ.പി അഡ്രസുകളിലേക്ക് ഈ സന്ദേശങ്ങൾ എത്തിക്കാനുള്ള വിവരങ്ങൾ കൈമാറുക. ഫോണിലോ ടാബിലോ കമ്പ്യൂട്ടറിലോ ഗൂഗിൾ ആപ് തുറക്കുമ്പോഴും സന്ദേശം ലഭിക്കും. മൂന്ന് മാസത്തിനകം സ്മാർട്ട് ടിവിയിലും സന്ദേശങ്ങൾ എത്തിക്കാനുള്ള സംവിധാനം നിലവിൽ വരും.