'ക്രിസ്​മസ്​ നക്ഷത്രത്തിന്​ പകരം വീടുകളിൽ മകരനക്ഷത്രം' -വർഗീയ ആഹ്വാനവുമായി സംഘപരിവാർ

തിരുവനന്തപുരം: ക്രിസ്​മസ്​ കാലത്ത് ജാതിമത ഭേദമന്യേ വീടുകളിൽ ​നക്ഷത്രം തൂക്കുന്ന പതിവ്​ കേരളത്തിലുണ്ട്​. എന്നാൽ ഇക്കുറി​ ഹൈന്ദവ വീടുകളിൽ ക്രിസ്​മസ്​ നക്ഷത്രത്തിന്​ പകരം മകരനക്ഷത്രം തൂക്കണമെന്ന വർഗീയ​ ആഹ്വാനവുമായി രംഗത്തെത്തിയിരിക്കുകയാണ്​ സംഘപരിവാർ അനുകൂലികൾ. സമൂഹമാധ്യമങ്ങളിലൂടെയാണ്​ ഹിന്ദുത്വവാദികളുടെ ആഹ്വാനം.

മകര നക്ഷത്രത്തിൻെറ ചിത്രത്തോടൊപ്പം ഇത്​ വാങ്ങാൻ താൽപര്യപ്പെടുന്നവർ വിളിക്കേണ്ട നമ്പർ സഹിതമാണ്​ പോസ്​റ്റുകൾ ഷെയർ ചെയ്യപ്പെടുന്നത്​. വാട്​സാപ്പിലൂടെയും മകരനക്ഷത്രം ഓർഡർ ചെയ്യാൻ അവസര​മൊരുക്കുന്നുണ്ട്​​.

'ഇത് എൻെറ സംരംഭം അല്ല ഒരു ഹിന്ദു സഹോദരന് വേണ്ടി നിങ്ങളോട് അഭ്യർത്ഥിക്കുകയാണ്. ഈ മകരവിളക്ക് കാലത്ത് (ക്രിസ്​മസ് കാലത്ത്) നമ്മുടെ വീടുകളില്‍ ക്രിസ്​മസ് നക്ഷത്രങ്ങള്‍ക്ക് പകരം, ഉയരട്ടെ മകരനക്ഷത്രങ്ങള്‍..മേൽപ്പറഞ്ഞ മകര നക്ഷത്രം വാങ്ങാൻ താൽപ്പര്യം ഉള്ളവർ ദയവായി മേൽകൊടുത്തിരിക്കുന്ന നമ്പറിൽ കോണ്ടാക്​ട്​ ചെയ്യാൻ അഭ്യർഥിക്കുന്നു' -ഇങ്ങനെയാണ്​ ഒരു സംഘപരിവാർ ഗ്രൂപ്പിൽ പങ്കുവെച്ച പോസ്​റ്റ്​.

പോസ്​റ്റിനെ അനുകൂലിച്ചും പ്രതികൂലിച്ചും പോസ്​റ്റുകൾക്ക്​ കീഴിൽ കമൻറുകളുടെ പൂരമാണ്​. ആശയത്തെ അനുകൂലിക്കുന്നവർ ഉൽപന്നത്തിൻെറ വിലയും മറ്റും അന്വേഷിച്ച്​ ഓർഡർ ചെയ്യാൻ തുടങ്ങി​. ഇതോ​െടാപ്പം തന്നെ പോസ്​റ്റിനെ പരിഹസിച്ച്​ നിരവധി പേരാണ്​ രംഗത്തെത്തിയത്​. അതോടൊപ്പം കേരളത്തിൻെറ മതസൗഹാർദ്ദ അന്തരീക്ഷം തകർക്കാൻ ശ്രമിക്കുന്ന സംഘ പരിവാറുകാരുടെ ശ്രമങ്ങൾ വിലപ്പോവില്ലെന്നാണ്​ കമൻറുകൾ.

'മറ്റ് മതങ്ങളെ സ്നേഹിക്കരുതെന്ന്, ആഘോഷങ്ങളിൽ പങ്കെടുക്കരുതെന്ന് ഹിന്ദു മതം എവിടെയാണ് പറഞ്ഞിട്ടുള്ളത്?? മനുഷ്യനാവാൻ പഠിച്ചിട്ട് പോരെ മകരോം, തകരോം' -ഒരു ഫേസ്​ബുക്ക്​ ഉപയോക്താവ്​ കമൻറിട്ടു.

'എന്തിന് മറ്റുള്ളവരെ ഹിന്ദു അനുകരിക്കണം. മകര നക്ഷത്രം എന്ന പേരിൽ മുൻപ് ഒരു വീട്ടിലും ഇങ്ങനെ ഒന്ന് കണ്ടതായി ഞാൻ ഓർക്കുന്നില്ല' -മറ്റൊരാളുടെ മറുപടി ഇങ്ങനെയായിരുന്നു.