മുദ്രാവാക്യം വിളിച്ചു; വനിതകൾ ഉൾപ്പെടെ എൻ.ജി.ഒ അസോ. നേതാക്കൾക്കെതിരെ ജാമ്യമില്ലാ കേസ്​

തിരുവനന്തപുരം: ഗ്രാമവികസന വകുപ്പിലെ മാനദണ്ഡവിരുദ്ധ സ്​ഥലംമാറ്റത്തിനും ചട്ടലംഘനങ്ങൾക്കുമെതിരെ ഗ്രാമവികസന കമീഷണറേറ്റിൽ പ്രതിഷേധ പ്രകടനം നടത്തിയ വനിതകൾ ഉൾ​പ്പെടെ എൻ.ജി.ഒ അസോസിയേഷൻ നേതാക്കൾക്കെതിരെ കേസ്​. സംസ്​ഥാന പ് രസിഡൻറ്​ ചവറ ജയകുമാർ, വൈസ്​ പ്രസിഡൻറ്​ എ.എം. ജാഫർഖാൻ, ഉൾപ്പെടെ 11 പേർക്കെതിരെയാണ്​ ജാമ്യമില്ല വകുപ്പുകൾ ചുമത്തി മ്യൂസിയം പൊലീസ്​ കേസെടുത്തത്​.

ഫെബ്രുവരിയിൽ അപേക്ഷ ക്ഷണിച്ച പൊതുസ്​ഥലംമാറ്റത്തിന് ആഗസ്​റ്റിലും ഉത്തരവ് ഇറങ്ങാത്തതിലും ഉത്തരവുകളിലെ മാനദണ്ഡ ലംഘനം ചൂണ്ടിക്കാട്ടിയുമാണ് അസോസിയേഷൻ പ്രതിഷേധിച്ചത്. മൂന്ന് വർഷമായി പൊതുസ്​ഥലംമാറ്റങ്ങളുടെ മാനദണ്ഡം ലംഘിച്ച്​, മന്ത്രി ഓഫിസും ഇടത് സംഘനകളും കൊടുക്കുന്ന ലിസ്​റ്റി​​െൻറ അടിസ്​ഥാനത്തിലാണ് ഉത്തരവുകൾ നൽകുന്നതെന്ന് സമരക്കാർ ആരോപിച്ചു.

പ്രതിഷേധിച്ച വനിതകൾ ഉൾപ്പെടെയുള്ള നേതാക്കൾക്കെതിരെ ഗ്രാമവികസന കമീഷണർ തന്നെയാണ് കേസ്​ നൽകിയത്. ജീവനക്കാർക്കെതിരെ വകുപ്പുതല നടപടി എടുക്കാനും ട്രാൻസ്​ഫർ ചെയ്യാനും നീക്കമുണ്ട്. ഇതിനെതിരെ ശക്​തമായ പ്രക്ഷോഭവുമായി മുന്നോട്ടുപോക​ുമെന്ന്​ എൻ.ജി.ഒ അസോസിയേഷൻ ഭാരവാഹികൾ അറിയിച്ചു.