തസ്​തികമാറ്റത്തിന്​ സംവരണം നൽകാനാവില്ല - മുഖ്യമന്ത്രി

തിരുവനന്തപുരം: തസ്​തികമാറ്റത്തിന്​ സംവരണവ്യവസ്​ഥ ബാധകമല്ലെന്ന്​ മുഖ്യമന്ത്രി പിണറായി വിജയൻ. കെ.എ.എസിലെ സംവരണ നിഷേധം സംബന്ധിച്ച ടി.എ അഹമ്മദ് കബീറി​​​െൻറ ശ്രദ്ധ ക്ഷണിക്കലിന്​ നിയമസഭയിൽ മറുപടി നൽകുകയായിരുന്നു അദ്ദേഹം.

കേരള അഡ്മിനിസ്‌ട്രേറ്റീവ് സര്‍വ്വീസ്​ ചട്ടങ്ങൾ അനുസരിച്ച്​ നേരിട്ടും തസ്​തിക മാറ്റം മുഖേനയും മാത്രമാണ്​ നിയമനം നടക്കുക. നേരിട്ടുള്ള നിയമനങ്ങൾക്ക്​ പൊതു സംവരണ തത്ത്വങ്ങൾ ബാധകമാണ്​. എന്നാൽ പി.എസ്.സി വഴി തസ്തികമാറ്റ നിയമനം നടത്തുന്ന വിവിധ വകുപ്പുകളുടെ മാതൃകയിലാണ് കെ.എ.എസിലെ തസ്തികമാറ്റ നിയമനവും ചിട്ടപ്പെടുത്തിയിരിക്കുന്നത്. അതിനാൽ ഇവിടെ സംവരണം ബാധകമല്ലെന്ന്​ മുഖ്യമന്ത്രി വ്യക്​തമാക്കി.

തസ്​തിക മാറ്റപ്രകാരമുള്ള നിയമനങ്ങളിലും സംവരണം വേണമെന്ന പട്ടികജാതി-പട്ടികവര്‍ഗക്ഷേമ കമ്മീഷ​​​െൻറയും സംസ്ഥാന ന്യൂനപക്ഷ കമ്മീഷ​​​െൻറയും നിർദേശം അഡ്വക്കേറ്റ്​ ജനറലി​​​െൻറ നിയമോപദേശ പ്രകാരം നടപ്പിലാക്കേണ്ടെന്ന്​ തീരുമാനിച്ചിട്ടുണ്ടെന്നും മുഖ്യമന്ത്രി സഭയിൽ അറിയിച്ചു. അതേസമയം, എസ്.സി-എസ്.ടി വിഭാഗങ്ങൾക്ക് പ്രാതിനിധ്യത്തില്‍ കുറവുണ്ടെങ്കിൽ അത്​ നികത്തുന്നതിന് സ്‌പെഷ്യല്‍ റിക്രൂട്ട്‌മെ​ൻറ്​ നടത്താന്‍ നിലവില്‍ സംവിധാനമുണ്ട്. ഇത് കെ.എ.എസിനും ബാധകമാണെന്നും അദ്ദേഹം പറഞ്ഞു.

സുപ്രീം കോടതി വിധിയും കേന്ദ്ര സർക്കാറി​​​െൻറ കത്തും സ്ഥാനക്കയറ്റത്തെ കുറിച്ചാണ്​. കേന്ദ്ര സർക്കാറി​ലെ ഉദ്യോഗക്കയറ്റങ്ങള്‍ക്ക് സിവില്‍ അപ്പീലിന്മേലുള്ള വ്യവഹാരങ്ങള്‍ തടസ്സമല്ലെന്നും നിയമപ്രകാരമുള്ള സ്ഥാനക്കയറ്റം നല്‍കാമെന്നുമാണ് സുപ്രീംകോടതി ഉത്തരവ്​. നിയമനങ്ങളില്‍ സംവരണം ഏര്‍പ്പെടുത്തുന്നത് സംബന്ധിച്ച് പേഴ്‌സണല്‍ മന്ത്രാലയത്തി​​​െൻറ കത്തിൽ പരാമര്‍ശിച്ചിട്ടില്ലെന്നും മുഖ്യമന്ത്രി അറിയിച്ചു.

സംവരണ നിഷേധം പുനഃപരിശോധിച്ച്​ എല്ലാ ധാരകളിലും സംവരണം നൽകണമെന്നും തസ്​തികമാറ്റത്തിന്​ സംവരണം വേണ്ടെന്ന എ.ജിയുടെ നിയമോപദേശം തള്ളിക്കളയണമെന്നും ടി.എ അഹമ്മദ് കബീർ പറഞ്ഞു.