മാസ്‌ക് ധരിക്കാത്തവർക്കെതിരെ ബലപ്രയോഗ​ം പാടില്ല –ഹൈകോടതി

കൊച്ചി: മാസ്‌ക് ധരിക്കാത്തവർക്കെതിരെ ബലപ്രയോഗ​േമാ മര്യാദയില്ലാത്ത പെരുമാറ്റമോ പൊലീസി​െൻറ ഭാഗത്തുനിന്ന്​ ഉണ്ടാകരുതെന്ന്​ ഹൈകോടതി. നിയമപരമായ നടപടികൾ സ്വീകരിക്കാം. പൊലീസിൽ ചെറിയൊരു വിഭാഗം ശരിയല്ലാത്ത വിധം പെരുമാറുന്നുണ്ട്. ഇതനുവദിക്കാനാവില്ലെന്നും ജസ്​റ്റിസ്​ ദേവൻ രാമചന്ദ്രൻ, ജസ്​റ്റിസ് ഡോ. കൗസർ എടപ്പഗത്ത് എന്നിവരടങ്ങുന്ന ഡിവിഷൻ ബെഞ്ച്​ പറഞ്ഞു. മാസ്‌ക് ധരിക്കാത്തതിന് പൊലീസ് മർദിച്ചെന്നും അസഭ്യം പറഞ്ഞെന്നും ആരോപിച്ച്​ കോഴിക്കോട് കൊയിലാണ്ടി സ്വദേശി വൈശാഖ് നൽകിയ ഹരജിയാണ്​ കോടതി പരിഗണിച്ചത്.

എറണാകുളം മുനമ്പത്ത് ഡ്രൈവറായ ഹരജിക്കാരൻ ഏപ്രിൽ 16ന് ഉച്ചയൂണ്​ കഴിഞ്ഞ് ജോലിസ്ഥലത്തേക്ക് നടക്കുമ്പോഴാണ് പൊലീസ് പിടികൂടിയതെന്ന്​ ഹരജിയിൽ പറയുന്നു. ഫോണിൽ സംസാരിക്കാൻ മാസ്‌ക് മാറ്റുമ്പോഴാണ് പൊലീസുകാർ പിടികൂടിയത്. പൊലീസുകാർ അസഭ്യം പറയുകയും എതിർത്തപ്പോൾ സ്​റ്റേഷനിൽ കൊണ്ടുപോയി രണ്ട്​ പൊലീസുകാർ ഉപദ്രവിക്കുകയും ചെയ്​തു. പിന്നീട് ജാമ്യത്തിൽ വിട്ടു. എറണാകുളം റൂറൽ എസ്.പിക്ക് പരാതി നൽകിയിട്ടും നടപടിയുണ്ടായില്ലെന്ന് ആരോപിച്ചാണ് ഹരജിക്കാരൻ കോടതിയെ സമീപിച്ചത്.

മാസ്‌ക് ധരിക്കാതെയാണ് പുറത്തിറങ്ങിയതെന്ന് ഹരജിക്കാരൻതന്നെ സമ്മതിക്കുന്നുണ്ടെന്ന്​ കോടതി ചൂണ്ടിക്കാട്ടി. പരാതിയുടെ നിജസ്ഥിതിയെക്കുറിച്ച് ഇപ്പോഴൊന്നും പറയുന്നില്ല. സത്യമാണെങ്കിൽ ഡി.ജി.പിയുടെ ഇടപെടൽ വേണ്ടതുണ്ട്​.

ആരോപണം പരിശോധിച്ച് ഡി.ജി.പി സത്യാവസ്ഥ വ്യക്തമാക്കി റിപ്പോർട്ട് നൽകാനും ഡിവിഷൻ ബെഞ്ച് നിർദേശിച്ചു. തുടർന്ന് ഹരജി ഈ മാസം ഏഴിന്​ വീണ്ടും പരിഗണിക്കാൻ മാറ്റി.