സീറ്റ്​ വിഭജനം: കോൺഗ്രസ്​-ജോസഫ് ഗ്രൂപ്​ ചർച്ചയിൽ തീരുമാനമായില്ല

തിരുവനന്തപുരം: സീറ്റ്​ വിഭജന വിഷയത്തിൽ കേരള കോൺഗ്രസ്​ ജോസഫ് ഗ്രൂപ്പുമായി കോൺഗ്രസ്​ നേതാക്കൾ ചൊവ്വാഴ്​ച രാത്രി നടത്തിയ ചർച്ചയും തീരുമാനമാകാതെ പിരിഞ്ഞു. രാത്രി എട്ടരയോടെ ആരംഭിച്ച ചർച്ച മൂന്നുമണിക്കൂർ നീണ്ടെങ്കിലും തീരുമാനത്തി​െലത്താനായില്ല. ബുധനാഴ്​ച വീണ്ടും ചർച്ചയാകാമെന്ന ധാരണയിൽ പിരിഞ്ഞു. ബുധനാഴ്​ച നടക്കുന്ന യു.ഡി.എഫ് യോഗത്തിനുമുമ്പ്​ എങ്ങനെയും സീറ്റ് വിഭജനം പൂര്‍ത്തിയാക്കാനുള്ള ശ്രമത്തിലാണ്​ കോൺഗ്രസ്​ നേതൃത്വം.

12 സീറ്റ്​ വേണമെന്ന ആവശ്യത്തിൽ ജോസഫ്​ പക്ഷവും പരമാവധി ഒമ്പതെന്ന നിലപാടിൽ കോണ്‍ഗ്രസും ഉറച്ചുനിൽക്കുന്നതാണ്​ സമവായത്തിന്​ തടസ്സം​. ചങ്ങനാശ്ശേരിക്കുപകരം മൂവാറ്റുപുഴ എന്ന നിർദേശം കോണ്‍ഗ്രസ് ​െവച്ചെങ്കിലും ജോസഫ് വിഭാഗം യോജിച്ചില്ല. ചങ്ങനാശ്ശേരി തങ്ങളുടെ സിറ്റിങ്​​ സീറ്റാണെന്നും അതിനു​പുറമെ മൂവാറ്റുപുഴ കൂടി വേണമെന്നുമാണ്​ ജോസഫ്​ പക്ഷത്തി​െൻറ ആവശ്യം. മൂവാറ്റുപുഴ സീറ്റ്​ വിട്ടുനല്‍കുന്നതിനെതിരെ കോണ്‍ഗ്രസില്‍ എതിർപ്പുയരുകയും ചെയ്തു. അതോടെ, മൂവാറ്റുപുഴയില്‍ കോണ്‍ഗ്രസ് മത്സരിക്കുമെന്ന് കെ.പി.സി.സി പ്രസിഡൻറിന്​ പ്രഖ്യാപി​േക്കണ്ടിവന്നു.​

ആര്‍.എസ്.പിയുമായി ബുധനാഴ്​ച രാവിലെ ചര്‍ച്ച നടക്കും. ഏഴ്​ സീറ്റ് ആവശ്യപ്പെട്ട ആര്‍.എസ്.പിക്ക് അഞ്ച്​ സീറ്റ്​ നല്‍കും. എന്നാല്‍, കഴിഞ്ഞ തവണ മത്സരിച്ച ആറ്റിങ്ങലും കയ്പമംഗലവും വേണ്ടെന്ന്​ അവരറിയിച്ചു. പകരം കുണ്ടറയാണ് അവര്‍ ആവശ്യപ്പെടുന്ന ഒരു സീറ്റ്. അത് നല്‍കാന്‍ കോണ്‍ഗ്രസ് തയാറല്ല. പാലാ സീറ്റ്​ നൽകി മാണി സി. കാപ്പനെ ഒതുക്കാമെന്നാണ്​ കോൺഗ്രസ്​ പ്രതീക്ഷിച്ചതെങ്കിലും ഒന്നുകൂടി ലഭിച്ചേ തീരൂവെന്ന നിലപാടിലാണ്​ അദ്ദേഹം.