മദ്യഷാപ്പുകൾ​ തുറക്കാൻ തീരുമാനിച്ചിട്ടില്ല -ടി.പി രാമകൃഷ്​ണൻ

തിരുവനന്തപുരം: സംസ്ഥാനത്തെ മദ്യഷാപ്പുകൾ തുറക്കുന്ന കാര്യത്തിൽ തീരുമാനമായിട്ടില്ലെന്ന്​ എക്സൈസ്​ വകുപ്പ്​ മന്ത്രി ടി.പി രാമകൃഷ്​ണൻ. ഇക്കാര്യത്തിൽ ചർച്ച ചെയ്​ത്​ തീരുമാനമെടുക്കുമെന്നും മന്ത്രി പറഞ്ഞു. 

റെഡ്​ സോൺ ഒഴികെയുള്ള സ്ഥലങ്ങളിൽ മദ്യ ഷാപ്പുകൾ ശുചീകരിച്ച്​ അണുവിമുക്തമാക്കിയ ശേഷം മാനദണ്ഡങ്ങൾക്ക്​ വിധേയമായി തുറക്കാമെന്ന്​ കേന്ദ്ര സർക്കാർ പറഞ്ഞിട്ടുണ്ട്​. സംസ്ഥാനത്തിൻെറ സാഹചര്യങ്ങൾ കൂടി പരിഗണിച്ചുകൊണ്ട്​ തുടർ നടപടികൾ സ്വീകരിക്കാനാണ്​ ഇപ്പോൾ ഉദ്ദേശിക്കുന്നത്​. ബാറുകൾ തുറക്കാൻ സർക്കാർ തീരുമാനിച്ചിട്ടില്ല. മാർഗ നിർദേശത്തിൽ ബാറുകൾ തുറക്കുന്നതുമായി ബന്ധപ്പെട്ട കാര്യങ്ങൾ പറഞ്ഞിട്ടില്ല. ബാറുകളുടെ കാര്യത്തിൽ പിന്നീട്​ ആലോചിച്ച്​ തീരുമാനമെടുക്കും.

മദ്യം ഓൺലൈനിൽ നൽകാൻ സർക്കാറോ ബീവറേജ്​ കോർപ്പറേഷനോ തീരുമാനമെടുത്തിട്ടില്ല. മദ്യം ലഭിക്കുന്നതിനായി ഓൺലൈൻ ബുക്കിങ്​ തുടങ്ങിയെന്ന തരത്തിൽ പ്രചരിക്കുന്ന വാർത്തയിൽ വാസ്​തവമില്ലെന്നും ടി.പി. രാമകൃഷ്​ണൻ പറഞ്ഞു.

കേരളത്തിൽ തുടർന്ന്​ ജോലി ചെയ്യാൻ സന്നദ്ധതയുള്ള അന്തർ സംസ്ഥാന തൊഴിലാളികൾക്ക്​ എല്ലാവിധ സംരക്ഷണവും നൽകാൻ സർക്കാർ തീരുമാനിച്ചിട്ടുണ്ട്. ചില സ്ഥാപനങ്ങളിൽ അവർക്ക്​ താമസ സൗകര്യം, ഭക്ഷണം തുടങ്ങി എല്ലാ സംവിധാനങ്ങളുമുണ്ട്​. ചില തൊഴിലുടമകൾ എല്ലാ വിധ സംരക്ഷണവും അവർക്ക്​  ഒരുക്കുന്നുണ്ട്​. ഇവിടെ തുടർന്ന്​ ജോലിയിലേർപ്പെടാൻ അവർ സന്നദ്ധമാ​ണെങ്കിൽ അവർക്ക്​ ​ജോലി തുടരാനുള്ള സാഹചര്യം സംസ്ഥാനത്തുണ്ടെന്നും ലോക്​ഡൗണിൽ ഇളവ്​ വരുത്തുന്ന മുറക്ക്​ വിവിധ മേഖലകളിൽ തൊഴിൽ പുനസ്ഥാപിച്ചു വരികയാണെന്നും ടി.പി രാമകൃഷ്​ണൻ വ്യക്തമാക്കി.