വർഗീയശക്തി​കളോട്​ വിട്ടുവീഴ്ചയില്ല, ശക്തമായി നേരിടും -മുഖ്യമന്ത്രി

തിരുവനന്തപുരം: വർഗീയശക്തികളോട്​ വിട്ടുവീഴ്ചയുണ്ടാകില്ലെന്നും ശക്തമായി നേരിടുമെന്നും മുഖ്യമന്ത്രി പിണറായി വിജയൻ. ഇത്തരം സംഘടനകൾ ആളു​​കളെ കൊന്ന്​ തങ്ങളുടെ ഭാഗം ശക്തിപ്പെടുത്താനാണ്​ ശ്രമിക്കുന്നത്​. ​സിൽവർ ലൈൻ വിഷയത്തിൽ എൽ.ഡി.എഫ്​ നടത്തിയ രാഷ്​ട്രീയ പ്രചാരണ യോഗത്തിൽ സംസാരിക്കുകയായിരുന്നു അദ്ദേഹം.

വികസന പദ്ധതികൾക്കെതിരെ വർഗീയ സംഘടനകൾ ആകാവു​ന്നതെല്ലാം ചെയ്യും. ദേശീയപാത ഭൂമിയേറ്റെടുക്കൽ തടയാൻ കല്ലേറും തീവെപ്പും നടത്തി. ഗെയിൽ പൈപ്പ്​ ലൈനിനെതിരെ തെരുവിൽ സമരനാടകം നടത്തി. നാടിന്‍റെ സമാധാനം തകർക്കാൻ ലക്ഷ്യമിട്ട്​ നടത്തിയ വാട്​സ്​ആപ്​​ ഹർത്താലിന്​ പിന്നിലും ഇത്തരം ശക്തികളായിരുന്നു.

സിൽവർ ലൈൻ ജനങ്ങളു​ടെ ഭൂമിയും കിടപ്പാടവും നഷ്ടപ്പെടുത്തുമെന്ന​ പ്രചാരണം ശരിയല്ല. ജനങ്ങളെ വഴിയാധാരമാക്കിയുള്ള ഒരു വികസന പ്രവർത്തനവും നടപ്പാക്കില്ല. ഭാവിക്കാവശ്യമായ പദ്ധതിക്ക്​ ഭൂമിയേറ്റെടുക്കുന്നതിനെതിരെ പ്രക്ഷോഭം വന്നാൽ നടപ്പാക്കാതിരിക്കലല്ല സർക്കാറിന്‍റെ ചുമതല. പുരോഗമന നടപടികളെ എതിർത്ത പാരമ്പര്യമാണ്​ വലതുപക്ഷ ശക്തികൾക്കുള്ളത്​. സിൽവർ ലൈൻ പരിസ്ഥിതിക്ക്​​ കോട്ടമല്ല, നേട്ടമാണെന്നും അദ്ദേഹം കൂട്ടിച്ചേർത്തു.