കൊല്ലം ​​േകാവിഡ്​ മുക്തം; ചികിത്സയിലുണ്ടായിരുന്ന രണ്ടുപേരുടെയും പരിശോധന ഫലം നെഗറ്റീവ്​

കൊല്ലം: ജില്ലയിൽ ചികിത്സയിലുണ്ടായിരുന്നവരുടെയെല്ലാം പരിശോധന ഫലം നെഗറ്റീവ്​. ചികിത്സയിലുണ്ടായിരുന്ന രണ്ടുപേരുടെ പരിശോധന ഫലമാണ്​ നെഗറ്റീവായത്​. ഇതോടെ ഇന്നലെ രോഗം ഭേദമായ ഒരാൾ ഉൾപ്പടെ മൂന്നുപേർ ഇന്ന്​ ആശുപത്രിവിടും. 

മാർച്ച്​ 27ന്​ ദുബൈയിൽനിന്ന്​ മടങ്ങിയെത്തിയ പ്രാക്കുളം സ്വദേശിക്കായിരുന്നു ജില്ലയിൽ ആദ്യം കോവിഡ്​ സ്​ഥിരീകരിച്ചത്​. പിന്നീട്​ ചികിത്സയിൽ എത്തിയവരെ​ല്ലാം രോഗമുക്തരായി ആശുപത്രി വിട്ടു. രണ്ടുപേർ മാത്രമാണ്​ നിലവിൽ ചികിത്സയിലുണ്ടായിരുന്നത്​. വ്യാഴാഴ്​ച ഉച്ചയോടെ ലഭിച്ച ഇവരുടെ പരിശോധന ഫലവ​ും നെഗറ്റീവായി. 

ആദ്യം രോഗം സ്​ഥിരീകരിച്ച പ്രാക്കുളം സ്വദേശിയുടെ ബന്ധുവായ വീട്ടമ്മയാണ്​ കോവിഡ്​ ഇന്ന്​ നെഗറ്റീവായതിൽ ഒന്ന്​​. 44 ദിവസമായി ഇവർ പാരിപ്പള്ളി മെഡിക്കൽ കോളജിൽ ചികിത്സയിലായിരുന്നു. മാർച്ച്​ 31 നാണ്​ ഇവർക്ക്​ രോഗം സ്​ഥിരീകരിച്ചത്​. 

മുംബൈയിൽ നിന്ന്​ മടങ്ങിയെത്തിയ ശേഷം കോവിഡ്​ സ്​ഥിരീകരിച്ച ഒരു യുവതിയുടെയും പരിശോധന ഫലം നെഗറ്റീവായി. ഏപ്രിൽ രണ്ടിനായിരുന്നു ഇവർക്ക്​ രോഗം സ്​ഥിരീകരിച്ചത്​. 19 പേർക്കാണ്​ ജില്ലയിൽ ഇതുവരെ കോവിഡ്​ സ്​ഥിരീകരിച്ചത്​. ജില്ലയിൽ നാലുപേർ മാത്രമാണ്​ ഇനി ആശുപത്രികളിൽ നിരീക്ഷണത്തിലുള്ളത്. 19 സാമ്പിളുകളുടെയും ഫലം വരാനുണ്ട്​.