നിപ വൈറസ്​: ഭയപ്പെടേണ്ടതില്ല; ജാഗ്രത പാലിക്കണമെന്ന്​ മുഖ്യമന്ത്രി

തിരുവനന്തപുരം: കോഴിക്കോട് പേരാമ്പ്രയിലുണ്ടായ നിപ വൈറസ് ബാധയിൽ ജനങ്ങൾ ഭയപ്പെടേണ്ടതില്ലെന്ന്​ മുഖ്യമന്ത്രി പിണറായി വിജയൻ. രോഗം വ്യാപിക്കാതിരിക്കാൻ ബോധവത്കരണമാണ് വേണ്ടത്. ജനങ്ങൾ ജാഗ്രത പാലിക്കണം. കേരളത്തിൽ എല്ലായിടവും ജാഗ്രത നിർദേശിക്കുന്നുവെന്നും പിണറായി പറഞ്ഞു.

ജില്ലയിൽ നടന്ന നാല്​ മരണത്തിൽ മൂന്നും വൈറസ് മൂലം തന്നെയെന്ന്​ സ്​ഥിരീകരിച്ചിട്ടുണ്ട്​. സംസ്​ഥാനം ആദ്യം തന്നെ കേന്ദ്ര ആരോഗ്യ മന്ത്രാലയത്തിലും ലോക ആരോഗ്യ സംഘടനയിലും  ബന്ധപ്പെട്ടിരുന്നു. കേന്ദ്രം വിദഗ്​ധ സംഘത്തെ അയച്ചു. എല്ലാ കരുതൽ നടപടികളും പുരോഗമിക്കുന്നുണ്ട്​.  ആരോഗ്യമന്ത്രി അവലോകനം നടത്തി. മന്ത്രി ടി.പി രാമകൃഷ്ണൻ ജില്ലയിൽ ക്യാമ്പ് ചെയ്യുന്നുണ്ട്.

സ്വകാര്യ ആശുപത്രികളിൽ അടക്കം ചികിത്സ സംവിധാനങ്ങൾ സജ്ജമാണെന്നും മുഖ്യമന്ത്രി അറിയിച്ചു. ചികിത്സ പ്രശ്നമാവില്ല. സ്വകാര്യ ആശുപത്രികൾ അടക്കം എല്ലാവരും ഒന്നിച്ചു നിൽക്കണമെന്നും മുഖ്യമന്ത്രി പറഞ്ഞു.