മൂസയുടെ മയ്യിത്ത് ഖബറടക്കിയത് ​കോഴിക്കോട്​ കണ്ണംപറമ്പ്​ ശ്​മശാനത്തിൽ 

കോഴിക്കോട്​: നിപ വൈറസ്​ ബാധിച്ച്​ കോഴിക്കോട്ട്​ സ്വകാര്യ ആശുപത്രിയിൽ മരിച്ച പേരാ​മ്പ്ര പന്തീരിക്കര സ്വദേശി വളച്ചുകെട്ടി വീട്ടിൽ മൂസയുടെ മയ്യിത്ത്​ കോഴിക്കോട്​ കണ്ണംപറമ്പ്​ ശ്​മശാനത്തിൽ ഖബറടക്കി. ജില്ല ഭരണകൂടത്തി​​​െൻറയും ആരോഗ്യവകുപ്പി​​​െൻറയും കടുത്ത നിയന്ത്രണമുള്ളതിനാൽ അടുത്ത ബന്ധുക്കളും ഉറ്റ മിത്രങ്ങളും മാത്രമാണ്​ ഖബറടക്കൽ ചടങ്ങിലും നമസ്​കാരത്തിലും പ​െങ്കടുത്തത്​.

വൈറസ്​ പരക്കാൻ ഇടയുള്ളതിനാൽ വ്യാഴാഴ്​ച രാവിലെ മരിച്ച മൂസയുടെ മൃതദേഹം ജന്മനാട്ടിലേക്ക്​ കൊണ്ടുപോകുന്നത്​ അധികൃതർ വിലക്കിയിരുന്നു. ഇതിനാലാണ്​ നഗരത്തിലെ കണ്ണംപറമ്പ്​ ശ്​മശാനത്തിൽ മറവ്​ ചെയ്യാൻ തീരുമാനിച്ചത്​. ഇത്തരം മൃതദേഹം സംസ്​കരിക്കുന്നതിന്​ ലോകാരോഗ്യ സംഘടനയുടെ പ്രോ​േട്ടാക്കോൾ പ്രകാരമുള്ള എല്ലാ നിർദേശങ്ങളും പാലിച്ചായിരുന്നു സംസ്​കാര ചടങ്ങ്​.

വായു കടക്കാത്ത ഇരട്ട കവറിൽ പൊതിഞ്ഞ്​ പത്തടി താഴ്​ചയുള്ള ഖബറിൽ മറമാടാനായിരുന്നു അധികൃതരുടെ നിർദേശം. ഇതിനാൽ ആറടി താഴ്​ചയുള്ള ഖബർ നാലടി കൂടി കുഴിച്ച്​ കല്ല്​വെച്ച്​ പടവ്​ ചെയ്​താണ്​ ഖബരൊരുക്കിയത്​. ചടങ്ങിൽ എത്തിയവർക്കെല്ലാം കടുത്ത സുരക്ഷാ സംവിധാനവുമൊരുക്കിയിരുന്നു. ആശുപത്രിയിൽ നിന്ന്​ ആംബുലൻസിൽ കണ്ണംപറമ്പ്​ ഖബർസ്​ഥാ​​​െൻറ കവാടത്തിലെത്തിച്ച മൃതദേഹം കോഴിക്കോട്​ കോർപറേഷൻ ഹെൽത്ത്​ ഒാഫിസർ ഡോ. ആർ.എസ്​. ഗോപകുമാറും സഹ ഉദ്യോഗസ്​ഥരും അടുത്ത ബന്ധുക്കളായ നാലുപേരും ചേർന്ന്​ ഏറ്റുവാങ്ങി. ഇവരൊക്കെയും അതീവ സുരക്ഷാ സംവിധാനത്തിലുള്ള പ്രത്യേക വസ്​ത്രവും ഗ്ലൗസും മാസ്​കും എല്ലാം ഉപയോഗിച്ചിരുന്നു.

മൃതദേഹത്തിന്​ അഞ്ച്​ മീറ്റർ അകലെ നിന്നാണ്​ മയ്യിത്ത്​ നമസ്​കാരവും പ്രാർഥനയും നടത്തിയത്​. മൂസയുടെ അവശേഷിക്കുന്ന മകൻ മുത്തലിബും സഹോദരൻ മൊയ്​തുവും ഉറ്റ സുഹൃത്തുക്കളും അടുത്ത ബന്ധുക്കളും ചടങ്ങിന്​ എത്തിയിരുന്നു. കണ്ണംപറമ്പ്​ പളളി കമ്മിററി ഭാരവാഹികൾ ചടങ്ങിന്​ എല്ലാ സൗക​ര്യങ്ങളും ചെയ്​ത്​ അവസാനം വരെ ഉണ്ടായിരുന്നു.