വെള്ളമിറങ്ങാതെ, ഒറ്റപ്പെട്ട്​ നിലമ്പൂർ നഗരം

നിലമ്പൂർ: മൂന്നിടങ്ങളിൽ വെള്ളം കയറിയ നിലമ്പൂർ നഗരം വെള്ളിയാഴ്​ചയും ഒറ്റപ്പെട്ടുകിടക്കുകയാണ്. മേഖലയിൽ മ​ഴക് കെടുതി തുടരുകയാണ്​. ജ്യോതിപ്പടി, ജനതപ്പടി, വെളിയൻതോട്​ എന്നിവിടങ്ങളെല്ലാം വെള്ളത്തിലാണ്​. രാവിലെ വെള്ളം അൽ പമിറങ്ങിയെങ്കിലും പിന്നീട്​ പഴയ സ്​ഥിതിയിലായി. നിലമ്പൂർ പുന്നപ്പുഴക്ക്​ കുറുകെ എടക്കരക്കും പാലുണ്ടക്കുമിടയിലെ മുപ്പിനി പാലം തകർന്നു. വ്യാഴാഴ്​ച മുതൽ ഈ പാലം വെള്ളത്തിലാണ്​.

മൂത്തേടം-കരുളായി പഞ്ചായത്തുകളെ ബന്ധിപ്പിക്കുന്ന പാലാങ്കര പാലം മലവെള്ളപ്പാച്ചിലിൽ തകർന്നു. തഹസിൽദാരുടെ സന്ദർശനത്തെ തുടർന്ന്​ പാലം അടച്ചിട്ടു. കവളപ്പാറ മേഖലയിലേക്കുള്ള അവശേഷിക്കുന്ന ഏക മാർഗമായ പാലം തകർന്നത്​ ദുരിതാശ്വാസ പ്രവർത്തന​ങ്ങളെ ബാധിക്കും. എടക്കര, മൂ​ത്തേടം,വഴിക്കടവ്​ തുടങ്ങിയ പഞ്ചായത്തുകളും ഇതോടെ ഒറ്റപ്പെട്ടു. അതേ സമയം ഉരു​ൾപൊട്ടൽ ആദ്യമുണ്ടായ കരുളായി പഞ്ചായത്തിൽ സ്​ഥിതിഗതികൾ ആശ്വാസകരമാണ്​. വെള്ളമിറങ്ങിത്തുടങ്ങി. വൈദ്യുതി പുനസ്​ഥാപിച്ചു. മൂന്ന്​ ദുരിതാശ്വാസ ക്യാമ്പുകളിലായി 500 ലധികം​ പേരുണ്ട്​.

നാടുകാണി ചുരത്തിൽ രണ്ടിടത്ത്​ റോഡ്​ തകർന്നു. തകരപ്പാടി, തേൾപ്പാറ എന്നിവിടങ്ങളിലാണ്​ റോഡ്​ ഇടിഞ്ഞത്​. നാടുകാണിയിൽ വ്യാഴാഴ്​ച രാത്രി കുടുങ്ങിയ യാത്രക്കാരെ സുരക്ഷിത സ്​ഥാനങ്ങളിലേക്ക്​ മാറ്റി. വഴിക്കടവ്​ ചുരത്തിനു താഴെ താമസിക്കുന്നവരെ സുരക്ഷിത സ്​ഥാനങ്ങളിലേക്ക്​ മാറ്റി