നിലക്കൽ ദേവസ്വം ബോർഡിന്റെ പെട്രോൾ പമ്പ് പരിസരത്ത് പുലിയിറങ്ങി

ശബരിമല: നിലക്കൽ ദേവസ്വം ബോർഡിന്റെ പെട്രോൾ പമ്പ് പരിസരത്ത് പുലിയിറങ്ങി. പമ്പിലെ സി.സി.ടി.വി ക്യാമറയിലാണ് പുലിയുടെ ദൃശ്യങ്ങൾ പതിഞ്ഞത്. വ്യാഴാഴ്ച വൈകീട്ടാണ് പുലി പമ്പ് പരിസരത്ത് എത്തിയതായ ദൃശ്യങ്ങൾ ലഭിച്ചത്. ദിവസവും രാവിലെ മുതൽ വൈകീട്ട് വരെയാണ് പമ്പ് പ്രവർത്തിക്കുന്നത്.

രാത്രി സമയങ്ങളിൽ ആന ഉൾപ്പെടെയുള്ള വന്യമൃഗങ്ങൾ പമ്പിന് സമീപം എത്താറുള്ളതിനാൽ, എല്ലാ ദിവസവും രാവിലെ എത്തുമ്പോൾ ജീവനക്കാർ ആദ്യം സി.സി.ടി.വി ദൃശ്യങ്ങൾ പരിശോധിക്കാറുണ്ട്. വെള്ളിയാഴ്ച രാവിലെ പമ്പിലെത്തിയ ദേവസ്വം ജീവനക്കാർ സി.സി.ടി.വി പരിശോധിച്ചപ്പോഴാണ് പമ്പ് പരിസരത്തുകൂടി പുലി നടന്നുപോകുന്നതും ഇവിടെ കിടക്കുന്നതും ദൃശ്യങ്ങളിൽ കണ്ടത്.