നവവധുവിനെ ഭർതൃവീട്ടിൽ ആത്മഹത്യ ചെയ്ത നിലയിൽ കണ്ടെത്തി

നെടുമങ്ങാട്: നവവധുവിനെ ഭർതൃവീട്ടിൽ ആത്മഹത്യ ചെയ്ത നിലയിൽ കണ്ടെത്തി. അരുവിക്കര മുള്ളിലവിൻമൂട് ടി.ആർ.എ-18 സോപാനം വീട്ടിൽ അക്ഷയ് രാജിന്റെ ഭാര്യ രേഷ്മ (24) ആണ് തൂങ്ങിമരിച്ച നിലയിൽ കണ്ടെത്തിയത്. ഇൗ സമയം സ്വകാര്യ ബാങ്ക് ജീവനക്കാരനായ ഭർത്താവ് അക്ഷയ് രാജ് വീട്ടിലില്ലായിരുന്നു. രാവിലെ വീട്ടുകാർ വാതിൽ തുറക്കാത്തതിനാൽ നടത്തിയ പരിശോധനയിലാണ് രേഷ്മയുടെ മ​ൃതദേഹം കണ്ടെത്തിയത്​. മൃതദേഹം നെടുമങ്ങാട് തഹസിൽദാർ അനിൽ കുമാറിന്റെ സാന്നിധ്യത്തിൽ പെ‌ാലീസ് ഇൻക്വസ്റ്റ് നടത്തി.

ആത്മഹത്യ കുറുപ്പിൽ ഭർത്താവിന് മറ്റെ‌ാരു ബന്ധമുണ്ടെന്ന് പറയുന്നു. സംഭവത്തിൽ ദുരൂഹത ആരോപിച്ച് രേഷ്മയുടെ ബന്ധുക്കൾ അരുവിക്കര സ്​റ്റേഷനിൽ പരാതി നൽകി. ശനിയാഴ്ച്ച രാത്രി 11 വരെ പെൺകുട്ടിയുടെ മാതാപിതാക്കൾ അക്ഷയുടെ വീട്ടിലുണ്ടായിരുന്നു. വിവാഹം കഴിഞ്ഞതിന് ശേഷത്തെ ആദ്യ ഓണം ആയതിനാൽ ഓണക്കോടിയുമായാണ് രേഷ്മയുടെ മാതാപിതാക്കൾ എത്തിയത്.

ഇരുവരും തമ്മിൽ പ്രണയ വിവാഹം നടന്നത്​ കഴിഞ്ഞ ജൂൺ ഒന്നിനായിരുന്നു. ആറ്റിങ്ങൽ പൊയ്കമുക്ക് പാറയടി വീട്ടിൽ രഘുനാഥൻ-ഉഷകുമാരി ദമ്പതികളുടെ മകളാണ്. സഹോദരൻ: അച്ചു.