കൊച്ചിയിൽ റോഡിലേക്ക് നവജാത ശിശുവിന്‍റെ മൃതദേഹം എറിഞ്ഞ സംഭവം; സമീപത്തെ ഫ്ലാറ്റിലെ കുടുംബത്തെ ചോദ്യം ചെയ്യുന്നു

കൊച്ചി: നടുറോഡിൽ നവജാത ശിശുവിന്‍റെ മൃതദേഹം കണ്ടെത്തിയ സംഭവത്തിൽ സമീപത്തെ ഫ്ലാറ്റിലെ കുടുംബത്തെ ചോദ്യം ചെയ്യുന്നു. ഫ്ലാറ്റ് നമ്പർ 5-സിയിലെ അച്ഛനെയും അമ്മയെയും മകളെയുമാണ് ചോദ്യം ചെയ്യുന്നത്. പരിശോധനയിൽ ഈ ഫ്ലാറ്റിലെ ശുചിമുറിയിൽ രക്തക്കറ കണ്ടെത്തിയിരുന്നു.

ഇന്ന് രാവിലെ 7.30ഓടെ പനമ്പിള്ളി നഗർ വിദ്യാനഗറിൽ കവറിൽ പൊതിഞ്ഞ നിലയിൽ റോഡിൽ നവജാതശിശുവിന്‍റെ മൃതദേഹം കണ്ടെത്തുകയായിരുന്നു. ആൺകുഞ്ഞിന്‍റെ മൃതദേഹമാണ് കണ്ടെത്തിയത്. സമീപത്തെ ഫ്ലാറ്റിൽനിന്നും റോഡിൽ ഒരു പൊതി വന്ന് വീഴുന്നത് സി.സി.ടി.വിയിൽ പതിഞ്ഞിരുന്നു. ഈ ദൃശ്യം കേന്ദ്രീകരിച്ചാണ് പൊലീസ് അന്വേഷണം നടത്തിയത്.

തുടർന്ന്, പൊലീസ് ഫ്ലാറ്റിലുള്ളവരുടെ മൊഴിയെടുത്തിരുന്നു. കഴുത്തിൽ തുണി മുറുക്കി കൊലപ്പെടുത്തിയ ശേഷം പുറത്തേക്ക് വലിച്ചെറിയുകയായിരുന്നു എന്നാണ് പൊലീസ് പറയുന്നത്. മൃതദേഹത്തിന്‍റെ ഇൻക്വസ്റ്റ് പുരോഗമിക്കുകയാണ്.