വരുന്നു പുതിയ മദ്യവിൽപനശാലകൾ; സർക്കാർ ഉത്തരവിറങ്ങി

തിരുവനന്തപുരം: സംസ്ഥാനത്ത്​ പുതിയ മദ്യവിൽപനശാലകൾ അനുവദിച്ച് സർക്കാർ ഉത്തരവിറങ്ങി. എത്ര മദ്യവിൽപനശാലകളാണ് ആരംഭിക്കുന്നതെന്ന് ഉത്തരവിലില്ല. പൂട്ടിപ്പോയ മദ്യശാലകൾ പ്രീമിയം ഷോപ്പുകളായി ആരംഭിക്കണമെന്നും വാക്- ഇൻ സൗകര്യത്തോടെ പുതിയ വിൽപനശാലകൾ ആരംഭിക്കണമെന്നും ബെവ്കോ ആവശ്യപ്പെട്ടിരുന്നു. അതിന്‍റെ ഭാഗമായാണ്​ ഉത്തരവ്​. ഉചിതമായ സ്ഥലങ്ങൾ കണ്ടെത്തി ഔട്ട്​ലെറ്റുകൾ ആരംഭിക്കാമെന്നാണ്​ ഉത്തരവിൽ പറയുന്നത്​.

പുതിയ മദ്യനയത്തിന്‍റെ ഭാഗമായി 68 ഔട്ട്​ലെറ്റുകൾ തുറക്കുമെന്നാണ് ബെവ്​കോ അധികൃതർ നൽകുന്ന വിവരം. നേരത്തേ പൂട്ടിപ്പോയ ഷോപ്പുകളാണ് ഇതിൽ കൂടുതലും. ദേശീയ-സംസ്ഥാന പാതയോരങ്ങളുടെ 500 മീറ്റർ പരിധിയിൽ മദ്യവിൽപന നിരോധിച്ചുള്ള കോടതി ഉത്തരവ്​ വന്നതോടെയാണ് പട്ടികയിലുള്ള മിക്ക ഷോപ്പുകളും പൂട്ടേണ്ടിവന്നത്. പകരം സ്ഥലം കണ്ടെത്താൻ കഴിയാത്തതിനാൽ ഇവ തുറക്കാൻ സാധിച്ചിരുന്നില്ല. കണ്ടെത്തിയ ചില സ്ഥലങ്ങളിലാകട്ടെ പ്രാദേശിക പ്രശ്നങ്ങളുണ്ടായതിനെ തുടർന്ന് മുന്നോട്ടു പോകാനും സാധിച്ചില്ല.

അതിന്‍റെ അടിസ്ഥാനത്തിലാണ്​ പുതിയ മദ്യശാലകൾ ആരംഭിക്കാൻ ബെവ്​കോ അനുമതി തേടിയത്​. അടച്ചുപൂട്ടിയ ഷോപ്പുകൾ പ്രീമിയം ഷോപ്പുകളായാണ്​ തുറക്കുന്നത്​. അവിടങ്ങളിൽ അടിസ്ഥാന സൗകര്യങ്ങൾ ഉൾപ്പെടെ ഒരുക്കും. പുതിയ മദ്യനയത്തിലും ഇക്കാര്യം വ്യക്തമാക്കിയിരുന്നു. തിരുവനന്തപുരം-5, കൊല്ലം-6, പത്തനംതിട്ട-1, ആലപ്പുഴ-4, കോട്ടയം-6, ഇടുക്കി-8, എറണാകുളം-8, തൃശൂർ-5, പാലക്കാട്-6, മലപ്പുറം-3, കോഴിക്കോട്-6, വയനാട്-4, കണ്ണൂർ-4, കാസർകോട്-2 എന്നിങ്ങനെയാണ്​ പുതുതായി ആരംഭിക്കാൻ പോകുന്ന മദ്യശാലകളുടെ എണ്ണം എന്നാണ്​ വിവരം. സർക്കാറിന്‍റെ പുതിയ മദ്യനയത്തിനെതിരെ വ്യാപകമായ പ്രതിഷേധം​ നിലനിൽക്കെയാണ്​​ പുതിയ മദ്യശാലകൾ തുറക്കാൻ അനുമതി​.