പുതിയ ​മാനദണ്ഡം: രണ്ട്​ പഞ്ചായത്തിൽ ട്രിപ്പിൾ ലോക്​ഡൗൺ; ആളുകൾ പുറത്തിറങ്ങുന്നത്​ തടയാൻ പൊലീസ്​ നടപടി സ്വീകരിക്കും

പാലക്കാട്​: സംസ്ഥാന സർക്കാറിന്‍റെ പുതിയ കോവിഡ്​ മാനദണ്ഡ പ്രകാരം പാലക്കാട്​ ജില്ലയിലെ രണ്ട്​ പഞ്ചായത്തുകളിൽ ട്രിപ്പിൾ ലോക്​ഡൗൺ. പ്രതിവാര അണുബാധ ജനസംഖ്യ അനുപാതം ( WIPR) 10 ൽ കൂടുതലായ അലനല്ലൂർ, ആലത്തൂർ ഗ്രാമപഞ്ചായത്തുകളിലാണ്​ ട്രിപ്പിൾ ലോക്ക് ഡൗൺ പ്രഖ്യാപിച്ച് കലക്​ടർ ഉത്തരവിറക്കിയത്​.

സമ്പൂർണ ലോക്ക് ഡൗൺ പ്രഖ്യാപിച്ച പ്രദേശങ്ങളിലെ ആളുകൾക്ക് ഭക്ഷണം, ഭക്ഷണസാധനങ്ങൾ എന്നിവ എത്തിച്ചു നൽകുന്നതിന് ആർ.ആർ.ടി, വളണ്ടിയർമാർ എന്നിവരുടെ സേവനം ഗ്രാമ പഞ്ചായത്തുകൾ ഉറപ്പാക്കണം. ഇവിടെ അവശ്യ സേവനങ്ങൾക്കും ആശുപത്രി യാത്രകൾക്കും അല്ലാതെ ജനങ്ങൾ പുറത്തിറങ്ങുന്നത് തടയാൻ ​െപാലീസ്​ നടപടി സ്വീകരിക്കണമെന്ന് ജില്ലാ കലക്ടർ അറിയിച്ചു.

അവശ്യ വസ്തുക്കൾ വിൽക്കുന്ന സ്ഥാപനങ്ങൾ രാവിലെ 7 മുതൽ ഉച്ചയ്ക്ക് 2 വരെ മാത്രം തുറക്കാം. പ്രദേശത്ത് ഹോം ഡെലിവറി മാത്രമാണ് അനുവദിച്ചിട്ടുള്ളത്. കഴിഞ്ഞയാഴ്ച ഈ രണ്ട്​ പഞ്ചായത്തുകളും ഡി കാറ്റഗറിയിലായിരുന്നു.

ഇതിന്​ പുറമേ ജില്ലയിൽ രോഗബാധ കൂടുതലുള്ള വാർഡുകളെ മൈക്രോ കണ്ടൈൻമെന്‍റ്​ സോണുകളാക്കിയും പ്രഖ്യാപിച്ചിട്ടുണ്ട്​. ഈ പ്രദേശങ്ങളിൽ കോവിഡ്​ പോസിറ്റീവാകുന്നവർ നിർബന്ധമായും ഡി.സി.സി അല്ലെങ്കിൽ സി.എഫ്​.എൽ.ടി.സികളിലേക്ക്​ മാറണം. ഇവിടെ ഹോം ഡെലിവറിക്കായി അവശ്യ വസ്​തുക്കൾ വിൽക്കുന്ന കടകളും ഹോട്ടലുകളും തുറക്കാം. അടിയന്തര ആവശ്യങ്ങൾക്കല്ലാതെ ജനങ്ങൾ പുറത്തിറങ്ങരുതെന്നും കലക്​ടർ നിർദേശിച്ചു.