കോഴിക്കോട് മധ്യവയസ്കൻ കഴുത്തറുത്ത് കൊല്ലപ്പെട്ട നിലയിൽ; അയൽവാസി തൂങ്ങിമരിച്ച നിലയിൽ

കോഴിക്കോട്: കുറ്റ്യാടിക്കടുത്ത കായക്കൊടിയിൽ മധ്യവയസ്കനെ കഴുത്തറുത്ത് കൊല്ലപ്പെട്ട നിലയിലും അയൽവാസിയെ തൂങ്ങിമരിച്ച നിലയിലും കണ്ടെത്തി. കായക്കൊടി ഈന്തുള്ള തറേമ്മല്‍ വണ്ണാന്‍റെപറമ്പത്ത് ബാബു (50)വിനെയാണ് വീട്ടിലെ കിടപ്പുമുറിയില്‍ കഴുത്തറുത്ത നിലയിൽ കണ്ടെത്തിയത്. ബാബുവിന്‍റെ അയൽവാസി രാജീവനെ തൂങ്ങിമരിച്ച നിലയിലും കണ്ടെത്തിയിട്ടുണ്ട്.

ബാബുവിന്‍റെ ദേഹമാസകലം പരിക്കേറ്റിട്ടുണ്ട്. കഴുത്ത് മുക്കാല്‍ ഭാഗം വേര്‍പ്പെട്ട നിലയിലാണ്. വയറില്‍ കുത്തേറ്റ് കുടല്‍ പുറത്തായ നിലയിലുമാണ്.

രാവിലെ എട്ടു മണിയോടെ ഭാര്യയാണ് ബാബുവിന്‍റെ മൃതദേഹം കണ്ടത്. പൊലീസ് എത്തി പരിശോധന നടത്തുന്നതിനിടെയാണ് അയല്‍വീടിന്‍റെ പിറകു വശത്ത് വിറകു പുരയില്‍ രാജീവനെ തൂങ്ങി മരിച്ച നിലയില്‍ കണ്ടെത്തിയത്.

തൊട്ടില്‍പാലം പൊലീസ് അന്വേഷണം തുടങ്ങി. പ്രവാസിയായിരുന്ന ബാബു ഹോട്ടല്‍ തൊഴിലാളിയാണ്. രാജീവന്‍ ഓട്ടോ ഡ്രൈവറാണ്.