നീറ്റ്: തമിഴ്​നാട്ടിൽ നിന്ന്​ എത്തിയ വിദ്യാര്‍ഥിയുടെ പിതാവ് ഹൃദയാഘാതത്തെ തുടർന്ന്​ മരിച്ചു

കൊച്ചി:  നീറ്റ് പരീക്ഷ എഴുതാൻ തമിഴ്​നാട്ടിൽ നിന്ന്​ മകനോടൊപ്പം കൊച്ചിയിലെത്തിയ തിരുവാരൂര്‍ ജില്ലയിലെ തിരുത്തുറൈപ്പൂണ്ടി കൈകാട്ടി എസ്. എസ്.കൃഷ്ണസ്വാമി (47) ഹൃദയസ്​തംഭനത്തെ തുടർന്ന്​ മരിച്ചു​. തമ്മനം നളന്ദ പബ്ലിക് സ്‌കൂളിലായിരുന്നു മകൻ കസ്തൂരി മഹാലിംഗത്തിന്​ പരീക്ഷ​. ശനിയാഴ്ച രാവിലെ​ കൊച്ചിയിലെത്തിയ ഇവർ ബന്ധു മുരുകന്‍ ജീവനക്കാരനായ ഹോട്ടലില്‍ മുറിയെടുക്കുകയായിരുന്നു.

ഞായറാഴ്​ച രാവിലെ കൃഷ്ണസ്വാമിക്ക്​ ചെറിയ നെഞ്ചുവേദനയും അസ്വാസ്ഥ്യവും അനുഭവപ്പെട്ടതിനാൽ മുരുകനാണ്​ കസ്തൂരിയെ പരീക്ഷ കേന്ദ്രത്തിൽ എത്തിച്ചത്. മടങ്ങിയെത്തിയപ്പോഴേക്കും കൃഷ്ണസ്വാമിയുടെ ആരോഗ്യനില വഷളായിരുന്നു. രാവിലെ എ​േട്ടാടെ അടുത്തുള്ള സ്വകാര്യ ആശുപത്രിയില്‍ എത്തിച്ചെങ്കിലും മറ്റൊരിടത്തേക്ക്​ റഫര്‍ ചെയ്​തു. അവിടെ എത്തിച്ചപ്പോഴേക്കും മരിച്ചിരുന്നു. 

പരീക്ഷ കഴിഞ്ഞിറങ്ങിയ കസ്തൂരിയെ പൊലീസ് വാഹനത്തില്‍ ജനറല്‍ ആശുപത്രിയിലെത്തിച്ച ശേഷമാണ്​ മരണവിവരം അറിയിച്ചത്​​. തിരുപ്പൂരിൽനിന്ന്​ കൃഷ്​ണസ്വാമിയുടെ ബന്ധുക്കളും ഇതിനകം കൊച്ചിയിലെത്തിയിരുന്നു. നടപടിക്രമങ്ങള്‍ പൂര്‍ത്തിയാക്കി വൈകീട്ട്​ 4.30 ഓടെ മൃതദേഹം നാട്ടിലേക്ക്​ കൊണ്ടുപോയി. തിരുവാരൂരിന്​ സമീപം സർക്കാർ ലൈബ്രേറിയനാണ് കൃഷ്ണസ്വാമി. തിരുവാരൂർ ഗവ.സ്കൂൾ പ്രധാനാധ്യാപിക ബി.മഹാദേവിയാണ്​ ഭാര്യ. മകള്‍ ഐശ്വര്യ എട്ടാം ക്ലാസ് വിദ്യാര്‍ഥിയാണ്.