യാത്രക്കാരെ വലച്ച് നാഗർകോവിൽ - കോട്ടയം എക്സ്പ്രസ്

തിരുവനന്തപുരം: യാത്രക്കാരുടെ ക്ഷമ പരീക്ഷിച്ചും വഴിയിലാക്കിയും നാഗർകോവിൽ-കോട്ടയം എക്സ്​പ്രസ്​ (16366). തിരുവനന്തപുരത്തുനിന്ന് കൊല്ലത്തേക്ക് ഏകദേശം മൂന്നു മണിക്കൂറാണ് ട്രെയിനിന്​ അനുവദിച്ചിരിക്കുന്നത്. ഇതാണ്​ യാത്രക്കാരെ ബുദ്ധിമുട്ടിലാക്കുന്നതും. കൊല്ലം ഭാഗത്തേക്കുള്ള വൈകുന്നേരത്തെ നിരവധി സ്ഥിരംയാത്രക്കാരുടെ ആശ്രയമായ ഈ ​ട്രെയിനിന്‍റെ സമയം പുനഃക്രമീകരിച്ച്​ സർവിസ്​ പൂർണമായും പ്രയോജനപ്പെടുത്താൻ നടപടിയുണ്ടാകണമെന്നാണ്​ ആവശ്യം.

നാഗർകോവിലിൽനിന്ന്​ ഉച്ചക്ക്​ ഒന്നിന്​ പുറപ്പെടുന്ന ട്രെയിൻ 2.30ന് തിരുവനന്തപുരം സെൻട്രലിൽ എത്തിച്ചേരുംവിധമാണ് നിലവിലെ സമയക്രമീകരണം. തിരുവനന്തപുരത്തുനിന്ന് 2.35ന് പുറപ്പെട്ട് വൈകീട്ട് 5.15ന് കൊല്ലത്തെത്തും. വൈകീട്ട് 4.10ന്​ പരവൂരിലെത്തുന്ന ട്രെയിൻ​ 12 കിലോമീറ്റർ മാത്രം അകലെ കൊല്ലത്തെത്തി അവിടെനിന്ന്​ യാത്ര തുടരാൻ എടുക്കുന്നത്​ ഒരു മണിക്കൂറാണ്​. അശാസ്ത്രീയ സമയക്രമം കാരണം തിരുവനന്തപുരത്തിനും കൊല്ലത്തിനും ഇടയിലുള്ള മിക്ക സ്റ്റേഷനുകളിലും നിശ്ചിത സമയത്തിനുമുമ്പ്​ ട്രെയിൻ ഓടിയെത്താറുണ്ട്. ഓഫിസുകളിലും മറ്റും ജോലിചെയ്യുന്ന സ്ഥിരംയാത്രക്കാർ ഇതുമൂലം മറ്റു മാർഗങ്ങൾ തേടുകയാണ്​.

തിരുവനന്തപുരം സെൻട്രലിൽനിന്ന് ഉച്ചക്ക്​ 2.50നുള്ള ജനശതാബ്ദി, മൂന്നിനുള്ള ചെന്നൈ മെയിൽ എന്നിവക്ക്​ ശേഷം ഈ ട്രെയിൻ 3.25ഓടെ പുറപ്പെടുന്ന രീതിയിൽ സമയം ക്രമീകരിക്കണമെന്നാണ്​ ആവശ്യം. നാഗർകോവിലിൽനിന്ന്​ തിരുച്ചിറപ്പള്ളി -തിരുവനന്തപുരം ഇന്റർസിറ്റി എക്സ്​പ്രസിന്​ പിന്നിലായി ഉച്ചക്ക്​ 1.50ഓടെ പുറപ്പെടും വിധം കോട്ടയം എക്സ്​പ്രസിന്‍റെ സമയം ക്രമീകരിച്ചാൽ 3.20ന്​ തിരുവനന്തപുരം സെൻട്രലിലെത്താം. സെൻട്രലിൽനിന്ന്​ 3.25ന് തിരിച്ചാൽ കൊച്ചുവേളിയിൽനിന്ന് പുറപ്പെടുന്ന ആഴ്ചവണ്ടികളെ വർക്കലയിൽ വെച്ച് കയറ്റിവിടാം. കൃത്യം 5.15ന് കൊല്ലത്തെത്താനും സാധിക്കും. തിരുവനന്തപുരത്തുനിന്നുള്ള സമയം വൈകുന്നത്​ കൂടുതൽ യാത്രക്കാർക്ക് ഗുണകരമാകും.