നാടുകാണി ചുരത്തിലെ ജാറം വീണ്ടും തകർത്തു; മഖാമിന് മുകളിൽ തെങ്ങും വാഴയും നട്ട നിലയിൽ

നിലമ്പൂർ: നാടുകാണി ചുരത്തിലെ നൂറ്റാണ്ട് പഴക്കമുള്ള മഖാം ജാറം വീണ്ടും തകർത്ത നിലയിൽ. അന്തർസംസ്ഥാന പാതക്കരികിലെ മുഹമ്മദ് സ്വാലിഹ് മഖാം ജാറമാണ് വെള്ളിയാഴ്ച രാവിലെ തകർത്തതായി കണ്ടത്. ഇതിന്​ മുകളിൽ തെങ്ങ്, വാഴ തൈകൾ നട്ട നിലയിലാണ്. ചുറ്റും മുളകുപൊടി വിതറി. ഇവിടെ കെട്ടിത്തൂക്കിയ കുപ്പിയുടെ അകത്തുനിന്ന്​ ലഭിച്ച കുറിപ്പ് പൊലീസ് കണ്ടെടുത്തു. സംഭാവനപ്പെട്ടിക്കും നേർച്ചപ്പെട്ടിക്കും കേട്​ വരുത്തിയിട്ടില്ല. ഒരുമാസത്തിനിടെ മൂന്നാം തവണയാണ് ഇവിടെ അക്രമം നടക്കുന്നത്.

പെരിന്തല്‍മണ്ണ ഡിവൈ.എസ്.പി എം.പി. മോഹനചന്ദ്രൻ, സ്പെഷൽ ബ്രാഞ്ച് ഡിവൈ.എസ്.പി ഉല്ലാസ്കുമാർ, എടക്കര സി.ഐ പി. അബ്​ദുൽ ബഷീർ, വഴിക്കടവ് എസ്.ഐ അഭിലാഷ് എന്നിവരുടെ നേതൃത്വത്തിൽ സ്ഥലത്തെത്തി അന്വേഷണം ആരംഭിച്ചു. മലപ്പുറത്ത് നിന്നുള്ള ഡോഗ്​ സ്ക്വാഡും വിരലടയാള വിദഗ്ധരും തെളിവെടുപ്പ് നടത്തി. സെപ്​റ്റംബർ ആറിനും 19നും ജാറത്തിന്​ കേടുപാട്​ വരുത്തിയിരുന്നു. ആനമറിയിലെ ഇർഷാദുൽ മുസ്​ലിമീൻ സംഘമാണ് ജാറത്തി‍​െൻറ പരിപാലനം. 2009 ഏപ്രിൽ എട്ടിനും ജാറം പൊളിക്കാൻ ശ്രമം നടന്നിരുന്നു. അന്ന്​ വണ്ടൂർ സ്വദേശികളായ നാലുപേർ പൊലീസി‍​െൻറ പിടിയിലായിരുന്നു. ആനമറിയിലെ ചങ്ങരായി കുടുംബമായിരുന്നു അക്കാലത്ത്​ ജാറം പരിപാലിച്ചിരുന്നത്. ഇതിന്​ ശേഷമാണ് ഇർഷാദുൽ മുസ്​ലിമീൻ സംഘം ഏറ്റെടുത്തത്.