ഒളിമ്പിക്​സ്​ മെഡൽ ജേത്രിയാണ്​ എ​െൻറ ചേച്ചിയും...

തൃശൂർ: ''ഇന്ന് ചേച്ചിക്ക്​ 32 വയസ്സ്. വീട്ടിലെ ഷെൽഫിൽ അവൾ നേടിയെടുത്ത മെഡൽ ഇരിപ്പുണ്ട്​. 2013ൽ ആസ്ട്രേലിയയിൽ നടന്ന സ്പെഷൽ ഒളിമ്പിക്സിൽ 'ബോച്ചേ' കായിക ഇനത്തിൽ ഇന്ത്യക്കുവേണ്ടി നേടിയ മെഡൽ. ഒരുകാലത്ത്​ ചേച്ചിയെക്കുറിച്ച്​ പറയാൻ മടിയായിരുന്നു എനിക്ക്.​ ഇന്ന്​ ഒരുമടിയുമില്ല. അവൾ മാനസിക വെല്ലുവിളി നേരിടുന്ന കുട്ടിയാണ്​. എ​െൻറ ചേച്ചിയാണ്​. ഏറെ ഉയരെയാണ്​...'' ചേച്ചി സോഫിയെക്കുറിച്ച്​ അനിയൻ എബി ഫേസ്​ബുക്കിൽ എഴുതിയ ഹൃദയസ്​പർശിയായ കുറിപ്പാണിത്​. ഒളിമ്പിക്​സിന്​ പിന്നാലെ പാരാ ഒളിമ്പിക്​സിലെ സുവർണ നേട്ടങ്ങൾ ആഘോഷിക്കുന്ന കാലത്ത്​ ഭിന്നശേഷിയുള്ളവരുടെ ഒളിമ്പിക്​സിൽ മെഡൽ സ്വന്തമാക്കിയിട്ടും അറിയപ്പെടാത്ത ഒരുപാട്​ പേരുണ്ട്​. അതിലൊരാളാണ്​ തൃശൂർ മുക്കാട്ടുകര കരേരക്കാട്ടിൽ സോഫി സെബാസ്​റ്റ്യൻ.

16 വർഷമായി മണ്ണുത്തി സ്​നേഹദീപ്​തി സ്​​പെഷൽ സ്​കൂളിലും പിന്നീട്​ ​തൊഴിൽ പരിശീലന വിഭാഗത്തിലുമായി തുടരുകയാണ്​ സോഫി. ആറാംക്ലാസുവരെ മറ്റ്​ കുട്ടികൾക്കൊപ്പം പൊതുസ്​കൂളിലായിരുന്നു അവർ. പിന്നീട്​ പഠനത്തിൽ പിന്നോട്ടുപോകുന്ന കാരണം തിരക്കിയപ്പോഴാണ്​ മാനസിക വെല്ലുവിളി നേരിടുന്ന കുട്ടിയാണെന്ന്​ മനസ്സിലായതെന്ന്​ മാതാവ്​ ടെസ്സി പറയുന്നു. തുടർന്നാണ്​ സ്​നേഹദീപ്​തിയിലെത്തിയത്​. അവിടെ വെച്ചാണ്​ പന്തുകൾ കൊണ്ടുള്ള കളിയായ 'ബോ​േച്ച' അഭ്യസിച്ചത്​. 2013ലാണ്​ ഔദ്യോഗിക മത്സരങ്ങൾ പൂർത്തിയാക്കി മണ്ണുത്തി സ്​നേഹ ദീപ്​തിയിലെ മൂന്നംഗ സംഘം ആസ്​േ​ട്രലിയയിൽ നടന്ന സ്​പെഷൽ ഒളിമ്പിക്​സിലേക്ക്​ പുറപ്പെട്ടത്​. സോഫിക്ക്​ പുറമെ ആയില്യ, മനുമോൾ ​എന്നിവരായിരുന്നു പ്രിൻസിപ്പൽ പുഷ്​പയോടൊപ്പം ആസ്​​േട്രലിയയിലെത്തിയത്​. നന്നായി മത്സരിച്ച്​ മൂവരും മെഡൽ കരസ്​ഥമാക്കുകയും ചെയ്​തു. ​​​​വ്യക്തിഗത നേട്ടമായി സോഫി വെള്ളി മെഡലും നേടി.

മുഖ്യമന്ത്രിയായിരുന്ന ഉമ്മൻ ചാണ്ടിയിൽനിന്ന്​ 40,000 രൂപ പ്രോത്സാഹനമായി ലഭിച്ചു എന്നതൊഴിച്ചാൽ നേട്ടത്തിന്​ വേണ്ടത്ര മാധ്യമ ശ്രദ്ധ കിട്ടിയില്ല. ആഘോഷവും ഉണ്ടായിരുന്നില്ല. വർഷങ്ങൾ കഴിയവേ സോഫി ഇപ്പോൾ സ്​കൂളിലേക്കെത്തുന്ന കുഞ്ഞുങ്ങളുടെ ആയയും അമ്മയും ടീച്ചറും എല്ലാമാണ്​. അത്ര അടുപ്പമാണ്​ സ്​കൂളുമായി. ഇതിനിടെ പിതാവ്​ സെബാസ്​റ്റ്യൻ മരിച്ചത്​ കുടുംബത്തിന്​ തിരിച്ചടിയായി.

കോവിഡ്​ മഹാമാരി വന്നതോടെ രണ്ടുവർഷമായി സ്​കൂൾ വിട്ട്​ മാതാവ്​ ടെസ്സിക്കൊപ്പം മുക്കാട്ടുകരയിലെ വീട്ടിലാണ്​. സഹോദരൻ എബി ഡൽഹിയിൽ ഫിസിക്കൽ ട്രെയിനറാണ്​. പാരലിംപിക്​സ്​ മാധ്യമ ശ്രദ്ധ നേടുകയും സ്​പെഷൽ ഒളിമ്പിക്​സിലെ മെഡൽക്കൊയ്​ത്തുകാർ വിസ്​മരിക്കപ്പെടുന്ന സാഹചര്യത്തിലുമാണ്​ ചേച്ചിയെക്കുറിച്ച്​ സമൂഹമാധ്യമത്തിൽ എഴുതിയതെന്ന്​ എബി 'മാധ്യമ'ത്തോട്​ പറഞ്ഞു.

കോവിഡ്​ കുറയുന്നതും കാത്ത്​ സോഫി ഇപ്പോഴും വീട്ടിലിരിപ്പാണ്; സ്​കൂളിലേക്ക്​ തിരിച്ചുപോയി കുഞ്ഞനിയന്മാരെ എന്ന്​ കാണാനാകും എന്ന പ്രതീക്ഷയോടെ.