മോഷ്​ടാവ്​ പുഴയിൽ ചാടി; വെള്ളമില്ലാത്തത്​ ‘ചതിച്ചു’

മൂ​വാ​റ്റു​പു​ഴ: മോഷണശേഷം മുങ്ങി പിന്നീട്​ നാട്ടുകാരുടെ കണ്ണിൽപെട്ടപ്പോൾ പാലത്തിൽനിന്ന്​ പുഴയിൽ ചാടിയ മോഷ്​ടാവ്​ ഡ്രാക്കുള സുരേഷിന്​ വെള്ളമില്ലാത്ത ഭാഗത്ത്​ വീണതോടെ ഗുരുതര പരിക്ക്​. ഫയർഫോഴ്​സ്​  സഹായത്തോടെ പൊലീസ് രക്ഷപ്പെടുത്തി മൂവാറ്റുപുഴ ജനറൽ ആശുപത്രിയിൽ പ്രവേശിപ്പിച്ചു.

 ശനിയാഴ്ച പുലർച്ച പെരുവംമൂഴി പാലത്തിൽനിന്നാണ് മോഷ്​ടാവ് പുത്തൻകുരിശ് വടയമ്പാടി കുണ്ടേലിക്കുടിയിൽ സുരേഷ് (37) പുഴയിൽ ചാടിയത്. വെള്ളിയാഴ്ച ഉച്ചയോടെയാണ് സംഭവപരമ്പരകൾക്ക് തുടക്കം. പെരുവംമൂഴിയിൽ കെട്ടിടം പണിയുന്നിടത്ത്​ എത്തി ​പഴ്സുകൾ മോഷ്​ടിച്ചത്​ തൊഴിലാളികൾ കണ്ടതോടെ ഇറങ്ങിയോടി പരിസരത്തെ കുറ്റിക്കാട്ടിൽ ഒളിച്ചു. നാട്ടുകാർ ഏറെ തിരഞ്ഞിട്ടും കണ്ടെത്തിയില്ല. പിന്നീട് പുറത്തു കടക്കാനുള്ള ശ്രമത്തിനിടെ നാട്ടുകാർ പിടികൂടിയെങ്കിലും രണ്ടുപേരുടെ കൈ കടിച്ചുമുറിച്ച് ഓടിമറഞ്ഞു. ഇതിനിടെ, ബൈക്ക് ശ്രദ്ധയിൽപെട്ട നാട്ടുകാർ അതി​​െൻറ ചോക്ക് ഊരിയിട്ട് കാത്തിരുന്നു. ശനിയാഴ്​ച പുലർച്ച ബൈക്ക് എടുക്കാനെത്തിയപ്പോൾ നാട്ടുകാർ ഓടിയെത്തി. ഇതോടെ പെരുവംമൂഴി പാലത്തിൽനിന്ന് ചാടുകയായിരുന്നു. വെള്ളമില്ലാത്ത സ്ഥലത്ത്​ വീണതിനാൽ ഗുരുതര പരിക്കേറ്റു.

2018 ജൂലൈ 29ന് മൂവാറ്റുപുഴ കച്ചേരിത്താഴത്തെ പി.ബി. അജിത്കുമാറി​​െൻറ ആധാരമെഴുത്ത് ഓഫിസിൽനിന്ന് ഒന്നരലക്ഷം മോഷ്​ടിച്ചതടക്കം 20ലേറെ കേസിൽ പ്രതിയാണ് ‌സുരേഷ്​. അഞ്ചുവർഷം മുമ്പ് കോലഞ്ചേരിയിൽ പള്ളിയിൽ മോഷ്​ടിക്കാൻ കയറി വ​െൻറിലേറ്ററിൽ കുടുങ്ങി അവിടെയിരുന്ന് ഉറങ്ങിപ്പോയ സുരേഷിനെ ഒടുവിൽ പൊലീസാണ് പുറത്തെടുത്തത്. 2018ൽ ബൈക്കപകടത്തിൽ പരിക്കേറ്റ്​ ആശുപത്രിയിൽനിന്ന്​ മുങ്ങി ഒളിവിൽ കഴിയുന്നതിനിടെയാണ്​ പൊലീസ്​ പിടിയിലായത്.