ഭർത്താവിന്‍റെ സമ്മതമില്ലാതെ മുസ്​ലിം സ്ത്രീക്ക് വിവാഹമോചനത്തിന്​ അവകാശം -ഹൈകോടതി

കൊച്ചി: ഭർത്താവിന്‍റെ സമ്മതമില്ലാതെതന്നെ മുസ്​ലിം സ്ത്രീക്ക് ഏകപക്ഷീയമായി വിവാഹമോചനം ​നേടാൻ ​അവകാശമുണ്ടെന്ന്​ ഹൈകോടതി. ഇസ്​ലാമിക വിവാഹമോചന മാര്‍ഗമായ ഖുൽഅ്​ പ്രകാരം മുസ്​ലിം സ്ത്രീക്ക് വിവാഹ​മോചനം നേടാവുന്നതാണെന്നും​ ഇസ്​ലാമിക നിയമം ഇത് അംഗീകരിക്കുന്നുണ്ടെന്നും ആവർത്തിച്ചാണ്​ ജസ്റ്റിസ്​ എ. മുഹമ്മദ്​ മുഷ്താഖ്​, ജസ്റ്റിസ്​ സി.എസ്.​ ഡയസ്​ എന്നിവരടങ്ങുന്ന ഡിവിഷൻ ബെഞ്ചിന്‍റെ ഉത്തരവ്​.

ഖുൽഅ്​ മുഖേന വിവാഹബന്ധം വേർപെടുത്താമെന്ന ഉത്തരവ്​ പുനഃപരിശോധിക്കണമെന്ന ഹരജി തള്ളിയാണ്​ കോടതി നിരീക്ഷണം. വാഹമോചനത്തിന്​ ഭർത്താവിനോട്​ സ്ത്രീ​ ത്വലാഖ്​ ആവശ്യപ്പെടണമെന്നും ഖുൽഅ്​ ഏകപക്ഷീയമായ അവകാശം സ്ത്രീക്ക്​ നൽകുന്നില്ലെന്നും ഹരജിക്കാർ വാദിച്ചു. ഭർത്താവ്​ അനുമതി നൽകിയാലേ വിവാഹമോചനം നടപ്പാകൂവെന്നും ചൂണ്ടിക്കാട്ടി. എന്നാൽ, ഇസ്​ലാമിൽ സ്ത്രീകളുടെ വിവാഹമോചന മാർഗത്തിന്​ ഭർത്താവിന്‍റെ സമ്മതവുമായി ബന്ധമില്ലെന്ന്​ കോടതി വ്യക്തമാക്കി.

വിവാഹമോചനം ഭാര്യ പ്രഖ്യാപിക്കണം, വിവാഹസമയത്ത്​ ലഭിച്ച സമ്മാനങ്ങളും മറ്റും തിരിച്ചു നൽകാൻ സമ്മതം അറിയിക്കണം, ഖുൽഅ്​ മാർഗം സ്വീകരിക്കും മുമ്പ്​ സാധ്യമായ ഒത്തുതീർപ്പ്​ ശ്രമങ്ങൾ നടന്നിരിക്കണം എന്നിവയാണ്​ ഖുൽഇന്‍റെ സാധുതക്ക്​ അനിവാര്യമായ ഘടകങ്ങൾ. ഈ ഘടകങ്ങൾ കൃത്യമാണെങ്കിൽ ഖുൽഇന്​ ​സാധുതയുണ്ടാകുമെന്ന്​ കോടതി വിലയിരുത്തി.

ഭർത്താവ്​ വിവാഹമോചന ആവശ്യം നിരസിച്ചാൽ ഖാദിയെയോ കോടതിയെയോ സമീപിക്കണമെന്ന വാദം ഹരജിക്കാർ ഉയർത്തിയിരുന്നു. എന്നാൽ, ഖുൽഅ്​ മാർഗത്തിന്​ സാധുതയുണ്ടായിരിക്കെ സ്ത്രീക്ക് ജുഡീഷ്യല്‍ സംവിധാനത്തെ ആശ്രയിക്കേണ്ടതില്ലെന്ന്​ കോടതി വ്യക്തമാക്കി. വിവാഹമോചനം കോടതി നടപടികളിലൂടെ മാത്രം നടപ്പാക്കുന്നത്​ ബുദ്ധിമുട്ടുണ്ടാക്കുന്നതായി ചൂണ്ടിക്കാട്ടി നൽകിയ ഒരു കൂട്ടം ഹരജികളിലാണ്​ വിവാഹമോചനത്തിന്​ മുസ്​ലിം സ്ത്രീക്ക്​ ഖുൽഇനെ ആശ്രയിക്കാമെന്ന്​ 2021 ഏപ്രിലില്‍ ഇതേ ബെഞ്ച്​ തന്നെ ഉത്തരവിട്ടത്​.