Begin typing your search above and press return to search.
proflie-avatar
Login
exit_to_app
exit_to_app
Homechevron_rightNewschevron_rightKeralachevron_rightഖുൽഅ്​: മുസ്​ലിം...

ഖുൽഅ്​: മുസ്​ലിം വനിതകൾക്ക്​ നീതിയുടെ വീണ്ടെടുപ്പായി ഹൈകോടതി വിധി​

text_fields
bookmark_border
highcourt judge
cancel
camera_alt

ജ: എ. മുഹമ്മദ്​ മുഷ്​താഖ്​, ജ: സി.എസ്​. ഡയസ്, അഡ്വ. മായിൻകുട്ടി മേത്തർ

കോഴിക്കോട്​: മുസ്​ലിംവനിതകൾക്ക്​ കോടതി കയറാതെ മതനിയമം (ശരീഅത്ത്) അനുസരിച്ച്​ വിവാഹമോചനം നേടാൻ അവസരം നൽകി കേരള ഹൈകോടതിയുടെ ഖുൽഅ്​ വിധി. കുടുംബജീവിതം ഒന്നിച്ചു കൊണ്ടുപോകാൻ ഒരു നിലക്കും സാധ്യമല്ലെന്നുവന്നാൽ സ്​ത്രീകൾക്ക്​ സ്വയം വിവാഹമുക്തി പ്രഖ്യാപിച്ചു പിരിയാൻ ഇസ്​ലാമികനിയമം നൽകുന്ന അവകാശമാണ്​ ഖുൽഅ്​ (ബന്ധവിഛേദനം).

ദാമ്പത്യജീവിതം തീർത്തും അസാധ്യമായിട്ടും വിവാഹ മോചനം നൽകാതെ സ്​ത്രീകളെ കഷ്​ട​പ്പെടുത്തുന്നതിന്​ അറുതി വരുത്തുന്ന സംവിധാനത്തിന്​ നിയമസാധുത നൽകുകയാണ്​ ജസ്​റ്റിസ്​ മുഹമ്മദ്​ മുഷ്​താഖ്, ​ ജസ്​റ്റിസ്​ സി.എസ്.​ ഡയസ്​ എന്നിവരടങ്ങിയ ഡിവിഷൻ ബെഞ്ചി​​െൻറ സുപ്രധാന വിധി. ഇനി മുതൽ മുസ്​ലിം വനിതകൾക്ക്​ അനിവാര്യഘട്ടങ്ങളിൽ വിവാഹമോചനം നേടാം.

സംഭാഷണങ്ങളിലൂടെ അനുരഞ്​ജനത്തിനുള്ള സാധ്യത അടഞ്ഞു എന്നുറപ്പാക്കുകയും വിവാഹ മൂല്യം (മഹ്​ർ) സ്​ത്രീ തിരിച്ചുനൽകുകയോ അതിനു വാക്കുകൊടുക്കുകയോ ചെയ്​തും വേണം ഖുൽഇലൂടെ വിവാഹമോചനം നേടാൻ. കുടുംബ കോടതിയിൽ രേഖാമൂലം അറിയിച്ച്​ ഖുൽഇന്​ അംഗീകാരം നേടാമെന്നും വിധിന്യായത്തിൽ വ്യക്തമാക്കിയിട്ടുണ്ട്​​. വിവാഹ മോചനം തേടി ഹൈകോടതിയിൽ സമർപ്പിച്ച വിവിധ അപ്പീൽ ഹരജികളിൽ ഒന്നിച്ച്​ വാദം കേട്ടാണ്​ ഹൈകോടതി വിധി. ​േകാടതി മുഖേനയല്ലാതെ സ്​ത്രീക്ക്​ വിവാഹമോചനം നേടാൻ അധികാരമില്ലെന്ന്​ 1972ൽ കെ.സി. മോയിൻ/നഫീസ കേസിൽ സിംഗിൾ ബെഞ്ച്​ നടത്തിയ വിധി ഡിവിഷൻ ബെഞ്ച്​ റദ്ദാക്കി.​ അര നൂറ്റാണ്ടായി നഷ്​ടപ്പെട്ട അവകാശമാണ്​ വിധിയിലൂടെ മുസ്​ലിം വനിതകൾക്ക്​ പുനഃസ്​ഥാപിച്ചു കിട്ടിയത്​.

ശരീഅത്ത്​ നിയമങ്ങളുടെ അടിസ്​ഥാനമായ ഖുർആ​െൻറയും പ്രവാചകചര്യ (സുന്നത്ത്​)യുടെയും വെളിച്ചത്തിലാണ്​ കോടതി വിധി പ്രസ്​താവിച്ചത്​. ഖുർആൻ രണ്ടാം അധ്യായത്തിലെ 228, 229, നാലാം അധ്യായത്തിലെ 1, 20, 21, 58,128 സൂക്തങ്ങളും അഞ്ചാം അധ്യായത്തിലെ എട്ടാം സൂക്​തവും പ്രബല ഹദീസ്​ ഗ്രന്ഥമായ സ്വഹീഹ്​ അൽബുഖാരിയും വിധിയിൽ തെളിവായി സ്വീകരിച്ചു.​ രാജ്യത്തെ പ്രമുഖ നിയമജ്ഞൻ ഡോ. താഹിർ മഹ്​മൂദി​​െൻറ പ്രശസ്​ത കൃതിയായ 'മുസ്​ലിം ലോ ഇൻ ഇന്ത്യ ആൻഡ്​​ അബ്​റോഡ്', ഇസ്​ലാമിക പണ്ഡിതനും ചിന്തകനുമായ സയ്യിദ്​ അബുൽ അഅ്​ല മൗദൂദിയുടെ 'ഹുഖൂഖുസ്സൗജൈൻ' (ഇണതുണ അവകാശങ്ങൾ) എന്നീ കൃതികളും കോടതി പരാമർശിച്ചിട്ടുണ്ട്​.

വിധിന്യായത്തിലെ 75ാം ​ഖണ്ഡികയിൽ ഖുൽഇ​െൻറ നടപടിക്രമം കോടതി വിശദീകരിച്ചു​. ഖുൽഅ്​​ ​ പ്രഖ്യാപനത്തിനു മുമ്പ്​ അനുരഞ്​ജനശ്രമം നടത്തണം. അതുപരാജയപ്പെട്ടാൽ ഖുൽഅ്​ ആവാം. വിവാഹ ബന്ധം ഒഴിയുന്നു (അവസാനിപ്പിക്കുന്നു) എന്ന സ്​ത്രീയുടെ പ്രസ്​താവനയാണ്​ ഇതി​െൻറ മർമം. ഒപ്പം ഭർത്താവിൽനിന്ന്​ കൈപ്പറ്റിയ മഹറും (വിവാഹമൂല്യം) മറ്റു സമ്മാനങ്ങളും തിരിച്ചുനൽകുമെന്ന്​ ഉറപ്പുനൽകണം. മതപരമായ കാ​ര്യങ്ങളിൽ കോടതിക്ക്​ കൃത്യത നൽകുന്നതിന്​ അഭിഭാഷകനും വ്യക്തിനിയമ പണ്ഡിതനുമായ അഡ്വ. കെ.ഐ. മായിൻകുട്ടി മേത്ത​ർ അമിക്കസ്​ക്യൂറിയായി കേസിൽ കോടതിയെ സഹായിച്ചു.

'മുസ്​ലിം വനിതകൾക്ക്​ ആത്മവീര്യം പകരുന്ന വിധി'–അമിക്കസ്​ ക്യൂറി

​ പൂർണമായും ശരീഅത്തിന്​ അനുസൃതമാണ്​ ഖ​ുൽഅ്​ സംബന്ധിച്ച ഹൈകോടതി ഡിവിഷൻ ബെഞ്ചി​െൻറ വിധിയെന്ന്​ കേസിൽ അമിക്കസ്​ ക്യൂറിയായി കോടതിയെ സഹായിച്ച അഡ്വ. മായിൻകുട്ടി മേത്തർ. മുസ്​ലിം വനിതകൾക്ക്​ ഏറെ ആത്മവീര്യം പകരുന്നതാണ്​ വിധി. ഇസ്​ലാം മുന്നോട്ടുവെച്ച കാ​ര്യങ്ങൾ ​കൃത്യമായി വിശകലനം നടത്തി കോടതി അനുവദിച്ചു എന്നേയുള്ളൂ.

ഇസ്​ലാമിക ശരീഅത്ത് പ്രകാരം വിവാഹ മോചനത്തിന്​ പുരുഷനുള്ളതു​പോലെ സ്​ത്രീക്കും അധികാരവും അവകാശവുമുണ്ട്​. പുരുഷന്​ ത്വലാഖും സ്​ത്രീക്ക്​​ ഖുൽഉം. ഖുർആനിലെ രണ്ടാം അധ്യായമായ അൽബഖറയിലെ 228, 229 സൂക്തങ്ങളിൽ ഇത്​ വ്യക്തമാക്കുന്നുണ്ട്​. ഏറ്റവും വിശ്വസ്​തമായ ബുഖാരി പോലുള്ള ഹദീസുകളിലും പ്രവാചകൻ ഖുൽഅ്​ അനുവദിച്ച സംഭവങ്ങൾ റിപ്പോർട്ട്​ ചെയ്​തിട്ടുണ്ട്​. ലോകത്ത്​ മുസ്​ലിം രാജ്യങ്ങളി​ലും ഇതര രാജ്യങ്ങളിലും കുടുംബ- വ്യക്തിനിയമങ്ങളിൽ ഖുൽഅ്​​ അനുവദിക്കുന്നുണ്ട്​.

എന്നാൽ, നമ്മുടെ രാജ്യത്ത്​​ കാലങ്ങളായി മുസ്​ലിം വനിതകൾക്ക്​ ഈ അവകാശം അനുവദിച്ചു കിട്ടിയിരുന്നില്ല. വിവാഹമോചനം നൽകാതെ സ്​ത്രീകളെ പീഡിപ്പിക്കുന്ന സംഭവങ്ങളിൽ നീതിലഭിക്കാൻ അവർക്ക്​ വർഷങ്ങളോളം ​ കോടതി കയറിയിറങ്ങണം. കോടതിയിലാവ​ട്ടെ ഹരജിയും എതിർ ഹരജിയുമൊക്കെയായി വിധി ലഭിക്കു​േമ്പാഴേക്കും കാലങ്ങളെടുക്കും. ഇത്​ വലിയ പണച്ചെലവും സമയനഷ്​ടവുമുണ്ടാക്കുന്നു. തീർപ്പുണ്ടാവു​േമ്പാഴേക്കും പലപ്പോഴും ആയുസ്സിലെ നല്ല കാലം കഴിഞ്ഞിരിക്കും. പുതിയ വിധിയോടെ ഈ ദുരവസ്ഥക്ക്​ അറുതിയായിരിക്കുകയാണ്​. കോടതിയെ സമീപിക്കാതെതന്നെ അനിവാര്യ ഘട്ടങ്ങളിൽ ഇനി മുതൽ മുസ്​ലിം വനിതകൾക്ക്​ ഭർത്താവിനെ വിവാഹ മോചനം (ഖുൽഅ്​) നടത്താം.

ഇതിനുപുറമെ മറ്റു വിവാഹ മോചന രീതികളായ മ​ബാറാത്ത്​ (ഉഭയ കക്ഷി തീരുമാന പ്രകാരമുള്ള വിവാഹ മോചനം) ത്വലാഖെ തഫ്​വീസ്​ (വിവാഹവ്യവസ്​ഥ ലംഘിക്കുന്നത്​ മൂലമുള്ള വിവാഹ മോചനം) എന്നിവക്കും ഇനി മുതൽ കോടതി കയറേണ്ടതില്ല. ​ ഇസ്​ലാമിക ശരീഅത്ത്​ വിവാഹത്തിൽ മുസ്​ലിം വനിതകൾക്ക്​ അനുവദിച്ച വ്യക്തി സ്വാതന്ത്ര്യം തുറന്നു കാട്ടിയിരിക്കുകയാണ് ഈ വിധിയിലൂടെ കേരള ഹൈകോടതി.​

Show Full Article
Girl in a jacket

Don't miss the exclusive news, Stay updated

Subscribe to our Newsletter

By subscribing you agree to our Terms & Conditions.

Thank You!

Your subscription means a lot to us

Still haven't registered? Click here to Register

TAGS:High CourtDivorceMuslim Divorce Verdict
News Summary - Muslim Divorce Verdict in Kerala High Court
Next Story