മുനമ്പം: വഖഫ്​ ട്രൈബ്യൂണലിലെ കേസിൽ സെബാസ്റ്റ്യൻ ജോസഫിനെ കക്ഷി ചേർത്തതിന്​ സ്റ്റേ

കൊച്ചി: മുനമ്പം വഖഫ്​ ഭൂമിയുമായി ബന്ധപ്പെട്ട്​ ​വഖഫ്​ ട്രൈബ്യൂണലിലുള്ള കേസിൽ താമസക്കാരനായ സെബാസ്​റ്റ്യൻ ജോസഫിനെ കക്ഷിചേർത്ത ഉത്തരവിന്​ ഹൈകോടതിയുടെ സ്​റ്റേ. ഭൂമി വഖഫ്​​ ചെയ്ത കുടുംബത്തിന്‍റെ പ്രതിനിധിയായ ഇർഷാദ്​ നൂർ മുഹമ്മദ്​ സേഠ്​ നൽകിയ ഹരജിയിലാണ്​ ജസ്​റ്റിസ്​ അമിത്​ റാവൽ, ജസ്റ്റിസ്​ മുരളി കൃഷ്ണ എന്നിവരടങ്ങുന്ന ഡിവിഷൻ ബെഞ്ചിന്‍റെ ഉത്തരവ്​. ഹരജി വീണ്ടും 26ന്​ ബന്ധപ്പെട്ട മറ്റ്​ ഹരജി​കൾക്കൊപ്പം പരിഗണിക്കാൻ മാറ്റി.

മുനമ്പത്തേത്​ വഖഫ്​ ഭൂമിയാണെന്ന വഖഫ്​ ബോർഡിന്‍റെ ഉത്തരവിനെതിരെ ഫാറൂഖ്​ കോളജ്​ മാനേജ്​മെന്‍റ്​ നൽകിയ ഹരജി വഖഫ്​ ട്രൈബ്യൂണലിന്‍റെ പരിഗണനയിലാണ്​. ഇതിനിടെയാണ്​ സെബാസ്റ്റ്യൻ ​ജോസഫ്​ കക്ഷിചേരാൻ ഹരജി നൽകുകയും അനുവദിക്കുകയും ചെയ്​തത്​. ഈ നടപടി നിയമപരമായി നിലനിൽക്കുന്നതല്ലെന്ന്​ ചൂണ്ടിക്കാട്ടിയാണ്​ നൂർ മുഹമ്മദ്​ സേഠ് ഹൈകോടതിയെ സമീപിച്ചത്​.

ഒറിജിനൽ നിയമനടപടികളിൽ കക്ഷിയല്ലാതിരുന്നവരെ അപ്പീൽ സ്വഭാവത്തിലുള്ള കേസിൽ കക്ഷി ചേർക്കാനാവില്ലെന്ന സുപ്രീം കോടതി ഉത്തരവടക്കം ചൂണ്ടിക്കാട്ടിയാണ്​ ഹരജി നൽകിയത്​. ഹരജിയിൽ എതിർ കക്ഷികളായ സെബാസ്റ്റ്യൻ ജോസഫ്​, വഖഫ്​ ബോർഡ്​, ഫാറൂഖ്​ കോളജ്​ മാനേജ്​മെന്‍റ്​ എന്നിവർക്ക്​ കോടതി​ നോട്ടീസ്​ ഉത്തരവായി. തുടർന്ന്​ സ്​റ്റേ അനുവദിക്കുകയായിരുന്നു​.