മുല്ലപ്പെരിയാറിൽ ജലനിരപ്പ് 140 അടിയായി; ഇടുക്കി ഡാമിന്‍റെ ഒരു ഷട്ടർ തുറക്കും

തൊടുപുഴ: മുല്ലപ്പെരിയാർ ഡാമിൽ ജലനിരപ്പ് 140 അടിയായി. ജലനിരപ്പുയരുന്ന സാഹചര്യത്തിൽ ഡാം തുറക്കുമെന്നാണ് റിപ്പോർട്ട്. 141 അടിയാണ് ഡാമിൽ റൂൾകർവ് പ്രകാരം പരമാവധി സംഭരിക്കാവുന്ന വെള്ളത്തിന്‍റെ അളവ്. പെരിയാർ തീരത്ത് താമസിക്കുന്നവർ അതീവ ജാഗ്രത പുലർത്തണമെന്ന് ഇടുക്കി കലക്ടർ അറിയിച്ചു. അതേസമയം, ഇടുക്കി ഡാമിൽ ഉച്ചക്ക് ശേഷം ഒരു ഷട്ടർ തുറക്കുമെന്ന് ജലവിഭവ മന്ത്രി റോഷി അഗസ്റ്റിൻ പറഞ്ഞു.

400 ഘനയടി വെള്ളമാണ് ഇപ്പോൾ മുല്ലപ്പെരിയാർ ഡാമിലേക്ക് ഒഴുകിയെത്തുന്നത്. അതേസമയം തമിഴ്‌നാട് കൊണ്ടുപോവുന്ന വെള്ളത്തിന്‍റെ അളവ് 900 ഘനയടിയായി വർധിപ്പിച്ചിട്ടുണ്ട്. വൃഷ്ടിപ്രദേശത്ത് തുടരുന്ന കനത്ത മഴയാണ് ഡാമിൽ ജലനിരപ്പ് ഉയരാൻ കാരണം.

ഇടുക്കി ഡാമിലും ജലനിരപ്പ് ഉയരുന്നുണ്ട്. ഇടുക്കി ഡാമിന്‍റെ ഒരു ഷട്ടർ ഉച്ചക്കു ശേഷം തുറക്കുമെന്ന് മന്ത്രി പറഞ്ഞു. ഇരുഡാമുകളും ഒരുമിച്ച് തുറക്കേണ്ട സാഹചര്യമില്ല. ഇടുക്കി ഡാം തുറക്കേണ്ട സാഹചര്യമില്ലെങ്കിലും കുറച്ചു ജലം ഒഴുക്കിവിടാമെന്ന തീരുമാനത്തിലാണ് ഡാം തുറക്കുന്നത്. ജലനിരപ്പ് വീണ്ടും ഉയരുകയാണെങ്കിൽ റെഡ് അലർട്ടിലെത്താൻ അനുവദിക്കാതെ ജലം തുറന്നുവിടും -റോഷി അഗസ്റ്റിൻ പറഞ്ഞു.