വിജയരാഘവ​ന്‍റെ പ്രസ്​താവന​ കപടമതേതരവാദിയുടേത്; മുസ്​ലീം ലീഗ്​ എന്നും മതേതര പക്ഷ​ത്തെന്ന്​ മുല്ലപ്പള്ളി

പാണക്കാട്​: സി.പി.എം സംസ്​ഥാന സെക്രട്ടറി എ. വിജയരാഘവൻ മുസ്​ലിം ലീഗിനെതിരെ നടത്തിയ പ്രസ്​താവന മതേതര പക്ഷത്തുള്ളവർക്ക്​ വേദനയുണ്ടാക്കിയെന്ന്​ കെ.പി.സി.സി പ്രസിഡന്‍റ്​ മുല്ലപ്പള്ളി രാമച​ന്ദ്രൻ. കപടമതേതരവാദിയുടെ ഹൃദയത്തിൽ നിന്നാണ്​ അത്തരം പ്രസ്​താവനകൾ വരികയെന്നും അദ്ദേഹം പറഞ്ഞു. മുസ്​ലിം ലീഗ്​ സംസ്​ഥാന പ്രസിഡന്‍റ്​ പാണക്കാട്​ ഹൈദരലി ശിഹാബ്​ തങ്ങളെ സന്ദർശിച്ച​ ശേഷം മാധ്യമങ്ങളോട്​ സംസാരിക്കുകയായിരുന്നു അദ്ദേഹം. കോൺഗ്രസ്​ നേതാക്കളായ ഉമ്മൻചാണ്ടിയും രമേശ്​ ചെന്നിത്തലയും പാണക്കാടെത്തിയത്​ യു.ഡി.എഫ്​ വർഗീയതയോട്​ സമരസപ്പെടുന്നതിന്​ തെളിവാണെന്ന്​ വിജയരാഘവൻ പറഞ്ഞതിനോട്​ പ്രതികരിക്കുകയായിരുന്നു മുല്ലപ്പള്ളി.

മുസ്​ലിം ലീഗിനെ ആക്ഷേപിക്കുന്നവർ ബി.ജെ.പിയുമായി വോട്ടുകച്ചവടം നടത്തിയവരാണെന്നും അദ്ദേഹം പറഞ്ഞു. തില്ല​ങ്കേരിയിലെയടക്കം വോട്ടുകണക്കുകൾ പരിശോധിച്ചാൽ ആർ.എസ്​.എസും സി.പി.എമ്മും തമ്മിലെ ധാരണ ബോധ്യപ്പെടും. സി.പി.എമ്മുമായുള്ള ബന്ധം വത്സൻ തില്ല​ങ്കേരിയടക്കം തുറന്നുപറഞ്ഞിട്ടുണ്ടെന്നും അദ്ദേഹം പറഞ്ഞു.

മുസ്​ലിം ലീഗിന്‍റെ മതേതര നിലപാട്​ 50 വർഷമായി തനിക്ക്​ നേരിട്ട്​ അനുഭവമുണ്ടെന്നും ആ പാർട്ടി ഒരു മതാധിഷ്​ഠിത പാർട്ടിയല്ലെന്നും മുല്ലപ്പള്ളി പറഞ്ഞു.