മുഹർറം ആഘോഷമല്ല, ഓണച്ചന്തയിൽനിന്ന്​ ആ വാക്ക് ഒഴിവാക്കണം -മുസ്​ലിം ലീഗ്​

കോഴിക്കോട്​: മുഖ്യമന്ത്രി ഉദ്​ഘാടനം ചെയ്യുമെന്ന്​ പ്രഖ്യാപിച്ച ഒാണം-മുഹർറം ചന്തയിൽനിന്ന്​ മുഹർറം എന്ന വാക്ക്​ ഒഴിവാക്കണമെന്ന്​ മുസ്​ലിം ലീഗ്​ സംസ്ഥാന ജനറൽ സെക്രട്ടറി പി.എം.എ. സലാം വാർത്തസമ്മേളനത്തിൽ ആവശ്യപ്പെട്ടു. ജൂലൈയിൽ ബലി പെരുന്നാളിന്​ സൗജന്യ ഭക്ഷണക്കിറ്റ്​ ഒഴിവാക്കിയവരാണ്​ മുഹർറം ചന്ത നടത്തുന്നത്​.

മുഹർറം ഓണത്തെപ്പോലെ മേളയോ ആഘോഷമോ അല്ല. കർബലയിൽ പ്രവാചക പൗത്രൻ കൊല്ലപ്പെട്ട നൊമ്പരപ്പെടുത്തുന്ന ഓർമകളാണ്​. മുസ്​ലിംകളെ ലൊട്ട്​ലൊടുക്ക്​ കാട്ടി കീശയിലാക്കാനാണ്​ ഇടതു ശ്രമം. മൂന്നക്ഷരം കൂട്ടിച്ചേർത്താൽ കീശയിലാവുമെന്ന ധാരണ തിരുത്തണം.

ഇസ്​ലാമിക കാര്യങ്ങളിൽ ആരാണ്​ സർക്കാറിന്​ ഉപദേശം നൽകുന്നതെന്നറിയില്ല. ചെഗുവേരക്കൊപ്പം സ്വർഗത്തിൽ പോവാനാഗ്രഹിക്കു​െന്നന്ന്​ പറഞ്ഞയാളുകളാണെങ്കിൽ ഇങ്ങനെയൊക്കെതന്നെ സംഭവിക്കും -അദ്ദേഹം വാർത്താസമ്മേളനത്തിൽ പറഞ്ഞു.

സഹകരണവകുപ്പിന്‍റെ കൺസ്യൂമർഫെഡ് മുഖേന ആരംഭിക്കുന്ന ഓണം-മുഹറം വിപണികളുടെ സംസ്ഥാനതല ഉദ്ഘാടനം ആഗസ്റ്റ്​ 11ന് മുഖ്യമന്ത്രി പിണറായി വിജയൻ ഓൺലൈനായി നിർവഹിക്കുന്നത്​. സഹകരണ സംഘങ്ങളുടെ നേതൃത്വത്തിൽ 2000 ഓണം-മുഹറം വിപണികളാണ് സംസ്ഥാനത്തുടനീളം ഒരുക്കുക.