കനയ്യകുമാർ ജെ.ഡി.യുവിൽ ചേരുന്നുവെന്ന പ്രചാരണം ​വ്യാജം -മുഹമ്മദ്​ മുഹ്​സിൻ എം.എൽ.എ

പട്ടാമ്പി: സി.പി.ഐ നേതാവും വിദ്യാർഥി സമരങ്ങളിലൂടെ ശ്രദ്ധേയനുമായ കനയ്യകുമാർ ജെ.ഡി.യുവിൽ ചേരുന്നുവെന്ന പ്രചാരണം ​വ്യാജമെന്ന്​ ജെ.എൻ.യുവിൽ സഹപാഠിയായിരുന്ന മുഹമ്മദ്​ മുഹ്​സിൻ എം.എൽ.എ. ബിഹാറിലെ ജെ.ഡി.യു മന്ത്രിയെ സന്ദർശിച്ചതിന്​ പിന്നാലെ ദേശീയ മാധ്യമങ്ങളക്കം ​കനയ്യകുമാർ ജെ.ഡി.യുവിൽ ചേരുന്നുവെന്ന തരത്തിൽ വാർത്ത നൽകിയിരുന്നു.

കനയ്യ സ്വന്തം പ്രദേശത്തെ ജനകീയപ്രശ്നം ബന്ധപ്പെട്ട മന്ത്രിയെ അറിയിക്കുന്നതിനായി സന്ദർശിച്ച സംഭവം വളച്ചൊടിച്ച്​ വാർത്തയാക്കിയിരിക്കുകയാണെന്നും ഇത്തരം വ്യജ വാർത്തക്കാരോട് ഒന്നും പറയാനിലെന്നും മുഹമ്മദ്​ മുഹ്​സിൻ പ്രതികരിച്ചു.

ബിഹാറിൽ മുൻനിര സി.​പി.ഐ നേതാവ്​ കൂടിയായ കനയ്യയെ അടുത്തിടെ പാർട്ടി ശാസിച്ചിരുന്നു. പട്​നയിൽ പാർട്ടി ആസ്​ഥാനത്ത്​ സി.പി.ഐ പ്രവർത്തകനു നേരെ കനയ്യ കൈയേറ്റം നടത്തിയെന്ന ആരോപണത്തെ തുടർന്നായിരുന്നു ശാസന. ഇതിനുപിന്നാലെ ബിഹാർ മന്ത്രിയും മുഖ്യമന്ത്രി നിതീഷ്​ കുമാറി​െൻറ വലംകൈയുമായ അശോക്​ ചൗധരിയുമായി നടത്തിയ കൂടിക്കാഴ്​ചക്കു പിറകെയാണ്​ അഭ്യൂഹങ്ങൾ ഉടലെടുത്തത്​.