എം.പി. വീരേന്ദ്രകുമാർ ഇനി ജ്വലിക്കുന്ന ഓർമ

കൽപറ്റ: പ്രമുഖ സോഷ്യലിസ്​റ്റ്​ നേതാവും എഴുത്തുകാരനും പാർല​െമൻറംഗവും മാതൃഭൂമി മാനേജിങ്​​ ഡയറക്​ടറുമായ എം.പി. വീരേന്ദ്രകുമാര്‍ എം.പി ഇനി ജ്വലിക്കുന്ന ഓർമ. കൽപറ്റ പുളിയാർമലയിൽ കുടുംബ ശ്​മശാനത്തിലെ ചിതയിൽ ഭൗതിക ശരീരം വെള്ളിയാഴ്​ച വൈകുന്നേരം അഞ്ചുമണിയോടെ ലയിച്ചു. ഔദ്യോഗിക ബഹുമതികളോടെയായിരുന്നു സംസ്​കാരം. മകൻ എം.വി. ശ്രേയാംസ്​കുമാർ ചിതക്ക്​ തീകൊളുത്തി. ജൈന മതാചാര പ്രകാരമായിരുന്നു ചടങ്ങുകൾ. രാഷ​​്ട്രീയ, സാമൂഹിക, സാംസ്​കാരിക രംഗ​ത്തെ പ്രമുഖരടക്കം സാമൂഹിക അകലം പാലിച്ച്​ അന്തിമോപചാരമർപ്പിച്ചു. 

വ്യാഴാഴ്​ച രാത്രി 11മണിയോടെ കോഴിക്കോട്ട്​ സ്വകാര്യ ആശുപത്രിയിൽ അന്തരിച്ച വീരേന്ദ്രകുമാറി​​െൻറ മൃതദേഹം വെള്ളിയാഴ്​ച ഉച്ചക്ക്​ ഒരു മണിയോടെയാണ്​ പുളിയാർമലയിലെ വസതിയിൽ എത്തിച്ചത്​. ഭാര്യ ഉഷ, മക്കളായ എം.വി. ശ്രേയാംസ്​ കുമാർ, ആശ, നിഷ, ജയലക്ഷ്​മി എന്നിവർ മൃതദേഹം വഹിച്ച ആംബുലൻസിനെ അനുഗമിച്ചിരുന്നു.  

വീട്ടിൽ രണ്ടര മണിക്കൂറോളം പൊതുദർശനമുണ്ടായി. സംസ്ഥാന സര്‍ക്കാറിനെ പ്രതിനിധാനം ചെയ്​ത്​ മന്ത്രിമാരായ എ.കെ. ശശീന്ദ്രന്‍, കെ. കൃഷ്ണന്‍കുട്ടി എന്നിവര്‍ അന്തിമോപചാരമർപ്പിച്ചു. മുഖ്യമന്ത്രിക്കു വേണ്ടി മന്ത്രി എ.കെ. ശശീന്ദ്രന്‍ റീത്ത് സമര്‍പ്പിച്ചു. ഗവര്‍ണര്‍ക്കും സംസ്ഥാന സര്‍ക്കാറിനും ജില്ല ഭരണകൂടത്തിനും വേണ്ടി ജില്ലാ കലക്ടര്‍ ഡോ. അദീല അബ്​ദുല്ല റീത്ത് സമര്‍പ്പിച്ചു.

എം.പിമാരായ കെ. സുധാകരന്‍, ജോസ്. കെ മാണി, എം.എല്‍.എമാരായ പി.ജെ. ജോസഫ്, സി.കെ. നാണു, സി.കെ. ശശീന്ദ്രന്‍, ഒ.ആര്‍. കേളു, ഐ.സി. ബലകൃഷ്ണന്‍, വി.പി. സജീന്ദ്രന്‍, ഇ.കെ. വിജയന്‍, ഷാഫി പറമ്പില്‍, കെ.എം. ഷാജി, എഴുത്തുകാരൻ ഒ.കെ. ജോണി, കെ.സി.ബി.സി സെക്രട്ടറി ജനറൽ ബിഷപ്​ ഡോ. മാർ തോമസ്​, കെ.പി.സി.സി വൈസ്​ പ്രസിഡൻറ്​ കെ.സി. റോസക്കുട്ടി ടീച്ചർ, കാർഷിക പുരോഗമന സമിതി ചെയർമാൻ പി.എം. ജോയി, ആര്യാടൻ ഷൗക്കത്ത്, സി.പി.ഐ നേതാവ്​ പന്ന്യൻ രവീന്ദ്രൻ, ഡി.സി.സി ഭാരവാഹികളായ പി.പി. ആലി, കെ.എൽ. പൗലോസ്​, എം.എ. ജോസഫ്​, സി.പി.എം ജില്ല സെക്രട്ടറി പി. ഗഗാറിൻ, മുസ്​ലിം ലീഗ്​ ജില്ല പ്രസിഡൻറ്​ പി.പി.എ. കരിം​, ഹരിതസേന ഡയറക്​ടർ അബ്രഹാം ബെൻഹർ, ലോക്​താന്ത്രിക്​ പാർട്ടി നേതാവ്​ കെ. കുഞ്ഞാലി, സംവിധായകൻ രഞ്​ജിത്​, നടന്മാരായ ജോയ്​ മാത്യു, സുരേഷ്​, പി.ഡി.പി സംസ്​ഥാന ജനറൽ സെക്രട്ടറി നൗഷാദ്​ തിക്കോടി, മുനീർ വടകര തുടങ്ങിയവർ വീരേന്ദ്രകുമാറിന്​ അന്ത്യാഞ്ജലി അര്‍പ്പിച്ചു. ദേശീയ രാഷ്​​ട്രീയത്തിലെ പ്രമുഖരും സാഹിത്യകാരന്മാരും അടക്കം നിരവധി പേർ അനുശോചനം അറിയിച്ചു.