എസ്​.എഫ്​.ഐ നേതാവിന്‍റെ വീട്ടിൽ നിന്ന്​ ഉത്തരക്കടലാസ്​ പിടിച്ചെടുത്ത സംഭവം; നടപടി നേരിട്ട അധ്യാപകനെ അസോ.​ പ്രഫസറാക്കാൻ നീക്കം

തിരുവനന്തപുരം: യൂനിവേഴ്​സിറ്റി കോളജിലെ കുത്ത്​ കേസ്​ പ്രതി ശിവരഞ്​ജിത്തി​െൻറ വീട്ടിൽനിന്ന്​ സർവകലാശാല ഉത്തരക്കടലാസ്​ പിടിച്ചെടുത്ത സംഭവത്തിൽ കേരള യൂനിവേഴ്​സിറ്റി ഡീബാർ ചെയ്​ത അധ്യാപകന്​ സ്​ഥാനക്കയറ്റം നൽകാമെന്ന്​ നി​യമോപദേശം. യൂനിവേഴ്​സിറ്റി കോളജ്​ അറബിക്​ അധ്യാപകൻ അബ്​ദുൽ ലത്തീഫിനെ സർവകലാശാല അറബിക്​ വിഭാഗത്തിൽ അസോസിയറ്റ്​ പ്രഫസറാക്കുന്നതിനാണ്​ നിയമോപദേശം.

അബ്​ദുൽ ലത്തീഫിനെ സർവകലാശാലയിൽ നിയമിക്കാൻ സെലക്ഷൻ കമ്മിറ്റി ശിപാർശ ചെയ്​തത്​ സിൻഡിക്കേറ്റി​െൻറ പരിഗണനക്ക്​ വന്നപ്പോൾ സർവകലാശാല ഡീബാർ ചെയ്​ത വിവരം ഉയർന്നുവന്നിരുന്നു. ഇതേതുടർന്നാണ്​ നിയമനത്തിൽ സ്​റ്റാൻഡിങ്​ കോൺസലിൽനിന്ന്​ സർവകലാശാല അനുകൂല നിയമോപദേശം നേടിയത്​. ഇൗ നിയമോപദേശത്തി​െൻറ അടിസ്​ഥാനത്തിൽ ലത്തീഫിനെ നിയമിക്കാനാണ്​ നീക്കം. പെരുമാറ്റച്ചട്ടം നിലവിൽ വരുന്നതിനുമുമ്പ്​ ശിപാർശ നൽകിയതിനാൽ മുഖ്യ തെരഞ്ഞെടുപ്പ് ഓഫിസറുടെ അനുമതിയോടെ സർക്കാറി​െൻറ കാലാവധി അവസാനിക്കുന്നതിന്​ മുമ്പ്​ നിയമനം നൽകാൻ വി.സിക്കുമേൽ സമ്മർദമുണ്ട്.

ഉത്തരക്കടലാസ് നഷ്​ടപ്പെട്ടത് സംബന്ധിച്ച് പൊലീസ് രജിസ്​റ്റർ ചെയ്ത കേസി​െൻറ അന്തിമ വിധിക്ക്​ വിധേയമായി പ്രഫസർ നിയമനം നൽകാവുന്നതാണെന്നാണ് സർവകലാശാല നിയമോപദേശക​െൻറ നിലപാട്. ഉത്തരക്കടലാസ് നഷ്​ടപ്പെട്ട സംഭവം നടന്ന് ഒന്നരവർഷം കഴിഞ്ഞ് നിയമസഭയിൽ ഒച്ചപ്പാടായതിന്​ ശേഷമാണ് സർവകലാശാല കേസ് പൊലീസിൽ റിപ്പോർട്ട്‌ ചെയ്തത്. രാഷ്​ട്രപതിയിൽനിന്ന് അറബിക്​ ഭാഷ ഗവേഷണത്തിന് കേന്ദ്ര സർക്കാറി​െൻറ പുരസ്‌കാരങ്ങൾ നേടിയ അപേക്ഷകരുൾപ്പടെയുള്ളവരെ ഒഴിവാക്കിയാണ് ലത്തീഫിന് നിയമനം നൽകാനുള്ള സെലക്ഷൻ കമ്മിറ്റിയുടെ തീരുമാനമെന്നാണ്​ ആക്ഷേപം. ലത്തീഫിന്​ പരീക്ഷ നടത്തിപ്പ്​ ചുമതലയുള്ള സമയത്താണ്​ യൂനിവേഴ്​സിറ്റി കോളജിൽനിന്ന്​ ഉത്തരക്കടലാസ്​ നഷ്​ടപ്പെടുന്നതും ശിവരജ്​ഞിത്തി​െൻറ വീട്ടിൽനിന്ന്​ കണ്ടെടുക്കുന്നതും.