മരണനിരക്ക്​ ഉയർന്നേക്കും; കൂടുതൽ പേർ കോവിഡ്​ ബ്രിഗേഡിന്‍റെ ഭാഗമാകണം -മുഖ്യമന്ത്രി

തിരുവനന്തപുരം: സംസ്​ഥാനത്ത്​ കോവിഡ്​ വ്യാപനം വർധിക്കുകയാണെന്നും സ്​ഥിതി രൂക്ഷമാണെന്നും മുഖ്യമ​ന്ത്രി പിണറായി വിജയൻ. രോഗവ്യാപനം തുടർന്നാൽ മരണ നിരക്ക്​ ഉയരുമെന്ന ആശങ്കയുണ്ട്​. ഇത്​ നേരിടാൻ കൂടുതൽ പേർ കോവിഡ്​ ബ്രിഗേഡിന്‍റെ ഭാഗമാകണമെന്നും അദ്ദേഹം ആഹ്വാനം ചെയ്​തു.

ഡോക്​ടർമാരും നഴ്​സുമാരും ഉൾപ്പെടെ 13,625 പേരാണ്​ നിലവിൽ കോവിഡ്​ ബ്രിഗേഡിൽ ഉള്ളത്​. രോഗവ്യാപനം വർധിക്കുന്ന സാഹചര്യത്തിൽ ഇത്​ പര്യാപ്​തമല്ല. കൂടുതൽ ആളുകൾ ഇതിന്‍റെ ഭാഗമാകണം. കോവിഡ്​ ബ്രിഗേഡ്​ വെബ്​സൈറ്റിൽ രജിസ്റ്റർ ചെയ്ത്​ ഈ ചരിത്ര ദൗത്യത്തിൽ പങ്കളികളാകണമെന്നും മുഖ്യമന്ത്രി അഭ്യർഥിച്ചു.

ജനിതക വ്യതിയാനം വന്ന വൈറസുകൾ മരണനിരക്ക്​ ഉയർത്തുമോ എന്ന ആശങ്കയുണ്ട്​. തൃശൂരിൽ 4 ദിവസം കൊണ്ട്​ രോഗികളുടെ എണ്ണം ഇരട്ടിയാകാൻ സാധ്യതയുണ്ടെന്നാണ്​ മുന്നറിയിപ്പ്​. രോഗികളുടെ എണ്ണം നമ്മുടെ ആരോഗ്യ മേഖലക്ക്​ താങ്ങാവുന്നതിലപ്പുറമായാൽ ചികിത്സ അവതാളത്തിലാകും. അത്തരം അവസ്​ഥ ഒഴിവാകാൻ നമ്മൾ ഇതുവരെ പുലർത്തിയ ജാഗ്രത തുടരണം. കഴിവതും എൻ 95 മാസ്​ക്​ ധരിക്കുക. അല്ലെങ്കിൽ ഇരട്ട മാസ്​ക്​ ധരിക്കുക. ഇക്കാര്യത്തിൽ സൂക്ഷ്​മത പാലിക്കണമെന്നും മുഖ്യമന്ത്രി പറഞ്ഞു.

തിരുവനന്തപുരത്ത്​ വാക്​സിനേഷൻ കേന്ദ്രങ്ങളിലെ തിരക്കൊഴിവാക്കാൻ ക്രമീകരണം ഏർപ്പെടുത്തിയിട്ടുണ്ട്​. ജില്ലയിൽ 51 കേന്ദ്രങ്ങളിലാണ്​ വാക്​സിനേഷൻ.

സ്വകാര്യ മെഡിക്കൽ കോളജുകളിലെ 75ശതമാനം കിടക്കകൾ കോവിഡ്​ ​രോഗികൾക്ക്​ മാറ്റിവെക്കും. ഇതിൽ 30 ശതമാനം നാളെ സജ്ജമാകും. താലൂക്ക്​ തലത്തിൽ ആംബുലൻസ്​ ടീമുകളെ നിയമിച്ചതായും മുഖ്യമന്ത്രി അറിയിച്ചു.

സംസ്​ഥാനത്ത്​ ഇന്ന്​ 32,819 പേർക്കാണ്​​ കോവിഡ്​ ബാധിച്ചത്​. 5015 പേർക്ക്​ രോഗം സ്​ഥിരീകരിച്ച കോഴിക്കോടാണ്​ ഏറ്റവും കൂടുതൽ രോഗികൾ. കഴിഞ്ഞ 24 മണിക്കൂറിനിടെ 1,41,199 സാമ്പിളുകളാണ്​ പരിശോധനാവി​േധയമാക്കിയത്​. 23.24 ആണ്​ ടെസ്റ്റ് പോസിറ്റിവിറ്റി നിരക്ക്. 32 പേർ മരണപ്പെട്ടു. 18,413 പേര്‍ രോഗമുക്തി നേടി. സംസ്​ഥാനത്ത്​ ആകെ 247181 പേരാണ്​ നിലവിൽ ചികിത്സയിലുള്ളതെന്നും മുഖ്യമന്ത്രി അറിയിച്ചു.