ഇടുക്കി ചെറുതോണി ഡാമിൽനിന്ന് കൂടുതൽ ജലം ഒഴുക്കിവിടും

തൊടുപുഴ: ഇടുക്കി ഡാമിന്‍റെ വൃഷ്ടി പ്രാദേശത്ത് ശക്തമായ മഴ തുടരുന്ന സാഹചര്യത്തിൽ ശനിയാഴ്ച രാവിലെ പത്ത്​ മുതൽ ചെറുതോണി ഡാമിന്‍റെ തുറന്ന ഷട്ടറിൽനിന്ന് കൂടുതൽ ജലം പുറത്തേക്ക് ഒഴുക്കി വിടും.

ഡാമിലെ ജലനിരപ്പ് അപ്പർ റൂൾ ലെവലായ 2400.03 അടിക്ക് മുകളിലെത്താൻ സാധ്യതയുള്ളതിനാൽ അധിക ജലം ക്രമീകരിക്കാനാണ്​ ഷട്ടർ കൂടുതൽ ഉയർത്തുന്നത്​.

ഡാമിന്‍റെ ഒരു ഷട്ടർ ഒരു മീറ്റർ വരെ ഉയർത്തി 100 ക്യുമെക്സ് നിരക്കിൽ വെള്ളം പുറത്തേക്ക് ഒഴുക്കി വിടാനാണ് തീരുമാനം. ചെറുതോണി, പെരിയാർ എന്നീ പുഴകളുടെ ഇരുകരകളിലും താമസിക്കുന്ന ജനങ്ങൾ ജാഗ്രത പാലിക്കണമെന്ന് ജില്ല കലക്ടർ അറിയിച്ചു.