32,500 പ്രതിവണ്ടികൾ

കോട്ടയം: വിവിധ കേസുകളുമായി ബന്ധപ്പെട്ട്​ സംസ്ഥാനത്തെ പൊലീസ്​ സ്​റ്റേഷനുകളിൽ പിടിച്ചിട്ട്​ നശിക്കുന്നത്​ 32,500ലധികം വാഹനങ്ങൾ! സ്​റ്റേഷനുകൾക്ക് പുറത്തും റോഡിന്‍റെ വശങ്ങളിലുമൊക്കെയാണ്​ ഇവയധികവും ഇട്ടിരിക്കുന്നത്​.

കോടതിയുടെയും സർക്കാർ നിയോഗിച്ച സമിതികളുടെയും നിർദേശാനുസരണം ഇത്തരത്തിൽ പിടിച്ചിട്ടിരിക്കുന്ന വാഹനങ്ങൾ നീക്കം ചെയ്യുകയോ ജപ്തി നടപടികൾ കൈക്കൊള്ളുകയോ ചെയ്യുന്നുണ്ട്​. എന്നാൽ, ഇതൊന്നും കാര്യമായി ഫലം കാണുന്നില്ലെന്നാണ്​ എണ്ണം​ സൂചിപ്പിക്കുന്നത്​.

പിടിച്ചെടുത്ത വാഹനങ്ങൾ തീർപ്പാക്കുന്നത്​ സംബന്ധിച്ച്​ ചീഫ്​ സെക്രട്ടറി, ആഭ്യന്തര അഡീ. ചീഫ്​ സെക്രട്ടറി എന്നിവരുടെ യോഗങ്ങളിൽ അവലോകനം ചെയ്യുന്നുണ്ട്​. വേഗത്തിൽ തീരുമാനമെടുക്കാൻ വാഹനങ്ങളുടെ നിരക്ക്​ കുറച്ച്​ നിശ്ചയിക്കുന്നതിനുള്ള അധികാരം മെക്കാനിക്കൽ ഡിവിഷൻ എക്സിക്യൂട്ടിവ്​, ചീഫ്​ എൻജിനീയർമാർക്ക്​ നൽകിയിട്ടുണ്ടെന്നും സർക്കാർ വൃത്തങ്ങൾ വിശദീകരിക്കുന്നു.

ഉടമകൾ എത്താത്തവ പൊലീസിന് ഉപയോഗിക്കാമെന്ന് ശിപാർശ

ഉടമകൾ രേഖകൾ ഹാജരാക്കി കൊണ്ടുപോകാത്ത വാഹനങ്ങൾ പൊലീസിന്​ ഉപയോഗിക്കാൻ സംവിധാനമുണ്ടാക്കണമെന്ന്​ ആഭ്യന്തരം സംബന്ധിച്ച സബ്​ജക്ട്​ കമ്മിറ്റിയുടെ ശിപാർശയുടെ അടിസ്ഥാനത്തിൽ തീരുമാനമെടുത്തെങ്കിലും തുടർനടപടിയില്ല.