സദാചാര സസ്​പെൻഷൻ: പൊലീസുകാരന്​ വീണ്ടും കുരുക്കൊരുങ്ങുന്നു

കോഴിക്കോട്​: 'സദാചാര ലംഘന​ം' ആരോപിച്ച്​ സസ്​പെൻഡ്​ ചെയ്​ത സിവിൽ പൊലീസ്​ ഒാഫിസർക്കെതിരെ കൂടുതൽ നടപടിക്കൊരുങ്ങി സിറ്റി പൊലീസ്​. സസ്​പെൻഷൻ സമൂഹ മാധ്യമങ്ങളിലടക്കം വലിയ ചർച്ചയാവുകയും സാംസ്​കാരിക പ്രവർത്തകരടക്കം പ്രതിഷേധവുമായി രംഗത്തുവരുകയും ചെയ്​തതോടെ ഉത്തരവ്​ പരസ്യപ്പെടുത്തിയെന്ന കാരണം ചൂണ്ടിക്കാട്ടിയാണ്​ കൺ​േ​​ട്രാൾ റൂമിലെ ഉമേഷ്​ വള്ളിക്കുന്നിനെതിരെ വീണ്ടും അച്ചടക്ക നടപടിക്കൊരുങ്ങുന്നത്​.

ഉത്തരവിറക്കിയ സിറ്റി പൊലീസ്​ മേധാവി എ.വി. ജോർജും സെക്ഷൻ ക്ലാർക്കും ഉത്തരവ്​ കൈപ്പറ്റിയ പൊലീസുകാരനും മാത്രം അറിയുന്നത്​ മാധ്യമങ്ങൾക്ക്​ ചോർത്തി നൽകി എന്നതടക്കം ചൂണ്ടിക്കാട്ടിയാണ്​ വിശദീകരണം തേടാനൊരുങ്ങുന്നത്​. അതിനിടെ വിവാദ ഉത്തരവിൽ പരാമർശിക്കുന്ന ഗായിക ആതിര കെ. കൃഷ്​ണൻ ഉത്തരവിലെ സ്​ത്രീവിരുദ്ധ പരാമർശങ്ങൾ ചൂണ്ടിക്കാട്ടി പൊലീസ്​ മേധാവിക്കെതിരെ ഉത്തമേഖല ​െഎ.ജി അശോക്​ യാദവിന്​ നൽകിയ പരാതിയിൽ അന്വേഷണം ആരംഭിച്ചു.

ഉത്തരവിൽ പരാമർശിക്കുന്ന കാര്യങ്ങൾ തെറ്റാണെന്നും തന്നെ തട്ടിക്കൊണ്ടുവന്നിട്ടില്ലെന്നും പൊലീസുകാരനുമായി സൗഹൃദ ബന്ധം മാത്രമാണുള്ള​െതന്നും ആതിര വ്യക്തമാക്കി. സ​്​പെഷൽ ബ്രാഞ്ച്​ അസി. കമീഷണർ വനിത പൊലീസില്ലാതെയാണ്​ മൊഴിയെടുക്കാനെത്തിയതെന്നും മൊഴിയിൽ നിർബന്ധിച്ച്​ ഒപ്പുവെക്കുകയായിരുന്നുവെന്നുമുള്ള ഇവരുടെ പരാതിയും വിഷയത്തിൽ സാംസ്​കാരിക പ്രവർത്തകരടക്കം ​വിവാദ ഉത്തരവിനെതിരെ രംഗത്തുവന്നതും പൊലീസിനെ പ്രതിരോധത്തിലാക്കിയിട്ടുണ്ട്​.

ഉമേഷ്​ വള്ളിക്കുന്നിനെതിരെയുള്ള ആക്ഷേപങ്ങളിലും ​െഎ.ജി അ​േന്വഷണം നടത്തുന്നുണ്ട്​. അതിനിടെ, ​പൊലീസ്​ അസോസിയേഷനും ഭരണകക്ഷിയിലെ ചില നേതാക്കൾക്കും സിറ്റി പൊലീസ്​ മേധാവിയുടെ നടപടിയിൽ നീരസമുണ്ട്​.

ശബരിമല വിഷയവുമായി ബന്ധപ്പെട്ട്​ ആക്രമികൾ മിഠായിത്തെരുവിൽ അഴിഞ്ഞാടിയത്​ തടയാൻ സിറ്റി ​പൊലീസ്​ മേധാവിക്കായില്ലെന്ന്​ ഫേസ്​ബുക്കിൽ എഴുതിയതി​െൻറ പേരിൽ സസ്​പെൻഷനിലാവുകയും ഇൻക്രിമെൻറ്​ തടയപ്പെടുകയും ചെയ്​ത ഉമേഷിന്​​ പന്തീരാങ്കാവ്​ യു.എ.പി.എ കേസി​െൻറ പിന്നാലെ, 'കാട്​ പൂക്കുന്ന നേരം' എന്ന സിനിമയുടെ ​േപാസ്​റ്റർ പങ്കുവെച്ചതി​ന്​ മെമ്മോയും കിട്ടിയിരുന്നു.

പിന്നാലെയാണ്​ സ്​ത്രീക്ക്​ ഫ്ലാറ്റെടുത്തുകൊടുക്കുകയും അവിടെ നിത്യസന്ദർശനം നടത്തുന്നുവെന്നും​ ചൂണ്ടിക്കാട്ടി സസ്​പെൻഡ്​ ചെയ്​തത്​.യു.എ.പി.എ കേസിലെ കോടതിവിധി വായിക്കണമെന്ന്​ ഫേസ്​ബുക്കിൽ പോസ്​റ്റിട്ടതിനും കഴിഞ്ഞ ദിവസം മെമ്മോ ലഭിച്ചു.

സിറ്റി പൊലീസ്​ മേധാവിക്കെതിരെ സി.പി.ഒ

കോഴിക്കോട്​: തന്നെ സേനയിൽനിന്ന്​ പുറത്താക്കാൻ ഗൂഢനീക്കം നടക്കുന്നതായി 'സദാചാര ലംഘന​ം' ആരോപിച്ച്​ സസ്​പെൻഷനിലായ സിവിൽ പൊലീസ്​ ഒാഫിസറുടെ വെളിപ്പെടുത്തൽ. സിറ്റി പൊലീസ്​ മേധാവി എ.വി. ജോർജും സ്​പെഷൽ ബ്രാഞ്ച്​ അസി. കമീഷണർ സുദർശനുമാണ്​ ഇതിന്​ ചുക്കാൻ പിടിക്കുന്നത്​. സ്​ഥലം മാറിപ്പോകുംമുമ്പ്​ തന്നെ സർവിസിൽനിന്ന്​ പുറത്താക്കുകയാണ്​ സിറ്റി പൊലീസ്​ മേധാവിയുടെ ലക്ഷ്യം -ഉമേഷ്​ വള്ളിക്കുന്ന്​ മാധ്യമങ്ങളോട്​ പറഞ്ഞു.

'ഞാൻ നേരത്തേ നിർമിച്ച ഷോർട്ട്​ ഫിലിമി​െൻറ റിലീസ്​ മാറ്റിവെക്കാത്തതി​െൻറ പകയാണ്​ പൊലീസ്​ മേധാവിക്ക്​​​.നാല്​ അച്ചടക്ക നടപടി എനിക്കെതി​െ​ര ഉണ്ടായി. ഇതിൽ മൂന്നും ഇദ്ദേഹം സിറ്റി പൊലീസ്​ മേധാവിയായ സമയത്താണ്​. രണ്ട്​ ഇൻക്രിമെൻറും അന്യായമായി കട്ട്​ ​െചയ്​തു.സദാചാരം പറഞ്ഞാണ്​ ഇപ്പോൾ നടപടിയെടുത്തത്​. സുഹൃത്തായ 31 വയസ്സുള്ള സ്​ത്രീക്ക്​ വീടെടുത്തു നൽകിയതിനാണ്​ ഇപ്പോഴത്തെ സസ്​പെൻഷൻ' ​ -ഉമേഷ്​ പറഞ്ഞു.

Latest Video: