മോൻസൺ കേസ്: മുഖ്യമന്ത്രിയുടെ ഓഫിസിനെതിരെ ഗുരുതര ആരോപണങ്ങളുമായി ഐ.ജി ലക്ഷ്‌മണിന്‍റെ ഹരജി

കൊച്ചി: മോൻസൺ മാവുങ്കലിന്‍റെ പുരാവസ്തു തട്ടിപ്പുകേസിൽ ഉൾപ്പെട്ട ഐ.ജി ലക്ഷ്‌മൺ മുഖ്യമന്ത്രിയുടെ ഓഫിസിനെതിരെ ഗുരുതര ആരോപണങ്ങളുമായി ഹൈകോടതിയിൽ ഹരജി നൽകി. തന്നെ കുറ്റമുക്തനാക്കണമെന്ന്​ ആവശ്യപ്പെട്ട് നൽകിയ ഹരജിയിലാണ് സംസ്ഥാനത്തെ ചില സാമ്പത്തിക ഇടപാടുകളിൽ മധ്യസ്ഥത വഹിക്കാനും തർക്കങ്ങൾ ഒത്തുതീർക്കാനും മുഖ്യമന്ത്രിയുടെ ഓഫിസ് കേന്ദ്രീകരിച്ച് അസാധാരണ ഭരണഘടനാ അതോറിറ്റി പ്രവർത്തിക്കുന്നുണ്ടെന്ന്​ ഉൾ​െപ്പടെ ആരോപിക്കുന്നത്.

ഹൈകോടതി ആർബിട്രേറ്റർമാർക്ക് നൽകുന്ന തർക്കങ്ങൾപോലും പരിഹരിക്കുന്നത് ഈ അതോറിറ്റിയാണ്​. തനിക്കെതിരെ കേസെടുത്ത നിയമവിരുദ്ധ നടപടിപോലും തിരശ്ശീലക്ക്​ പിന്നിൽ കളിക്കുന്ന ഈ അദൃശ്യ കരങ്ങളുടെയും ഭരണഘടനാതീതമായ ബുദ്ധിയുടെയും ഇടപെടലാണ്. എന്നാൽ ആരാണ് ഇതെന്ന് ഹരജിയിൽ പറയുന്നില്ല. ഇതിൽ സർക്കാറിന്‍റെ നിലപാട്​ തേടിയ ജസ്റ്റിസ് രാജ വിജയരാഘവൻ ഹരജി പരിഗണിക്കുന്നത്​ ആഗസ്റ്റ് 17ലേക്ക്​ മാറ്റി. ഇത് ഫയലിൽ സ്വീകരിച്ചിട്ടില്ല.

വ്യാജ പുരാവസ്തുക്കളുടെ പേരിൽ തട്ടിപ്പു നടത്തിയ കേസിൽ 2021 സെപ്റ്റംബർ 25നാണ് മോൻസണെ അറസ്റ്റ് ചെയ്തത്. നിലവിൽ പൊലീസ് ട്രെയിനിങ്​ ചുമതലയുള്ള ഐ.ജി ലക്ഷ്‌മണിനെ കേസിൽ മൂന്നാം പ്രതിയാക്കി ക്രൈംബ്രാഞ്ച് കഴിഞ്ഞ ജൂൺ ഒമ്പതിന് എറണാകുളം അഡീ. സി.ജെ.എം കോടതിയിൽ റിപ്പോർട്ട്​ നൽകിയിരുന്നു. ലക്ഷ്​മണിന്​ പുറമെ കെ.പി.സി.സി പ്രസിഡന്‍റ്​ കെ. സുധാകരൻ, മുൻ ഡി.ഐ.ജി എസ്. സുരേന്ദ്രൻ എന്നിവരെയും പ്രതിചേർത്തിരുന്നു.

എന്നാൽ, ആദ്യ എഫ്.ഐ.ആറിൽ തന്‍റെ പേരില്ലെന്ന് ലക്ഷ്​മണിന്‍റെ ഹരജിയിൽ പറയുന്നു. സാക്ഷികളും ആരോപണം ഉന്നയിച്ചിട്ടില്ല. പരാതിക്കാരൻ മുഖ്യമന്ത്രിക്ക്​ നൽകിയ കത്തിലും തന്‍റെ പേരില്ല. വകുപ്പുതല അന്വേഷണത്തിലും ക്ലീൻ ചിറ്റ് നൽകി. മുമ്പ് അന്വേഷണത്തെക്കുറിച്ച് എ.ഡി.ജി.പി ഹൈകോടതിയിൽ നൽകിയ റിപ്പോർട്ടിൽ എസ്.പി റാങ്കിന്​ മുകളിലുള്ള പൊലീസ് ഉദ്യോഗസ്ഥർക്ക്​ ആർക്കും കേസിൽ പങ്കില്ലെന്ന് വ്യക്തമാക്കിയിരുന്നു.

ഇതിനുശേഷം ഒരു രഹസ്യമൊഴിയുടെ അടിസ്ഥാനത്തിലാണ് പ്രതിചേർത്തത്. വിവാദത്തിലേക്ക് എന്തിനാണ് തന്നെ വലിച്ചിഴക്കുന്നതെന്ന് കേസ്​ അന്വേഷിക്കുന്ന ക്രൈംബ്രാഞ്ച് ഡിവൈ.എസ്.പിയുടെ രാഷ്ട്രീയ മേലാളന്മാർക്ക്​ മാത്രമേ അറിയൂ. തിങ്കളാഴ്ച ഹാജരാകാൻ ക്രൈംബ്രാഞ്ച് നോട്ടീസ് നൽകിയിട്ടുണ്ടെന്നും ഹരജിയിലുണ്ട്​. കേസിൽ ലക്ഷ്‌മണിന്​ നേരത്തേ ഹൈകോടതി ഇടക്കാല മുൻകൂർ ജാമ്യം അനുവദിച്ചിരുന്നു.