സ്​ത്രീകളെ ഉപയോഗിച്ച്​ പണം തട്ടാൻ ശ്രമം: നാലുപേർ അറസ്​റ്റിൽ

തളിപ്പറമ്പ്: സ്ത്രീകളെ ഉപയോഗിച്ച് സമ്പന്നരെ വലയിലാക്കി വിഡിയോയും ഫോട്ടോകളും രഹസ്യമായി ചിത്രീകരിച്ച് പണമാവശ്യപ്പെടുന്ന സംഘത്തിലെ നാലുപേർ അറസ്​റ്റിൽ. ചുഴലിയിലെ കെ.പി. ഇര്‍ഷാദ് (20), ബൈക്ക് മോഷണ കേസില്‍ റിമാന്‍ഡില്‍ കഴിയുന്ന കുറുമാത്തൂര്‍ ചൊര്‍ക്കളയിലെ  റുബൈസ് (22), കുറുമാത്തൂര്‍ വെള്ളാരംപാറയിലെ മുസ്തഫ (45), ചെങ്ങളായി നിടിയേങ്ങ നെല്ലിക്കുന്നിലെ പി.എസ്. അമല്‍ദേവ് (21) എന്നിവരെയാണ് തളിപ്പറമ്പ് ഡിവൈ.എസ്.പി കെ.വി. വേണുഗോപാലി​​​​െൻറ നേതൃത്വത്തില്‍ അറസ്​റ്റ്​ ചെയ്തത്​. ചപ്പാരപ്പടവ് കൂവേരിയിലെ അബ്​ദുൽ ജലീലി​​​​െൻറ പരാതിയിലാണ്​ അറസ്​റ്റ്​. 

സ്​ത്രീയോടൊപ്പമുള്ള ദൃശ്യങ്ങൾ പുറത്തുവിടുമെന്ന്​ ഭീഷണിപ്പെടുത്തി അബ്​ദുൽ ജലീലിൽനിന്ന്​ ഒരുകോടി രൂപ ആവശ്യപ്പെ​െട്ടന്നായിരുന്നു പരാതി. സ്‌കൂട്ടര്‍ മോഷണ കേസില്‍ അറസ്​റ്റിലായ റുവൈസിനെയും കൂട്ടുപ്രതി ഇര്‍ഷാദിനെയും ചോദ്യം ചെയ്തപ്പോഴാണ് തട്ടിപ്പ്​ സംബന്ധിച്ച വിവരം ലഭിച്ചത്. കണ്ണൂര്‍-കാസർകോട്​ ജില്ലകളിലെ നിരവധി മോഷണ കേസില്‍ പ്രതിയായ റുവൈസാണ് ബ്ലാക്ക്‌മെയിലിങ്ങി​​​​െൻറ ബുദ്ധികേന്ദ്രമെന്ന് പൊലീസ് പറഞ്ഞു.

കഴിഞ്ഞ ഏപ്രില്‍ മൂന്നിന് ഏഴാംമൈല്‍ റിഫായിയ പള്ളിയില്‍ നമസ്‌കാരത്തിനെത്തിയ ഏഴാംമൈല്‍ ചെറുകുന്നോന്‍ വീട്ടില്‍ ഷബീറി​​​​െൻറ സ്‌കൂട്ടര്‍ കവര്‍ച്ച ചെയ്ത കേസിലാണ്​ റുവൈസ് പിടിയിലായത്​. റുവൈസില്‍ നിന്ന് സ്‌കൂട്ടര്‍ വാങ്ങി നമ്പര്‍ പ്ലേറ്റ് മാറ്റി ഓടിച്ച കേസിലാണ് ഇര്‍ഷാദിനെ പൊലീസ് അറസ്​റ്റ്​ ചെയ്തത്. ഇരുവരെയും കൂടുതല്‍ ചോദ്യം ചെയ്തപ്പോഴാണ് ബ്ലാക്ക് മെയിലിങ്​ ഉള്‍പ്പെടെയുള്ള സംഭവങ്ങള്‍ പുറത്തായത്. പ്രതികളെ ഇന്ന് കോടതിയില്‍ ഹാജരാക്കും.

സി.ഐ കെ.ജെ. വിനോയി, പ്രിന്‍സിപ്പല്‍ എസ്‌.ഐ കെ. ദിനേശന്‍, അഡീ.എസ്.ഐ കെ.കെ. പ്രശോഭ്, എ.എസ്‌.ഐ ജോസ്, സീനിയര്‍ സി.പി.ഒ അബ്​ദുൽ റൗഫ്, സി.പി.ഒ ജാബിര്‍ എന്നിവരാണ് പ്രതികളെ പിടികൂടിയ സംഘത്തില്‍ ഉണ്ടായിരുന്നത്.