തിരുവനന്തപുരം ജനശതാബ്ദിയിൽ ഇനി ആധുനിക കോച്ചുകൾ

തിരുവനന്തപുരം: ജനപ്രിയ സർവിസുകളായ തിരുവനന്തപുരം-കണ്ണൂർ (12082), കണ്ണൂർ-തിരുവനന്തപുരം (12081) ജനശതാബ്​ദികൾ എൽ.എച്ച്​.ബി (ലിങ്ക് ഹോഫ്മാൻ ബുഷ്) കോച്ചുകളിലേക്ക്​. കാലപ്പഴക്കവും അസൗകര്യവുമേറിയ കോച്ചുകൾക്ക്​ പകരമായാണ്​ എൽ.എച്ച്​.ബി​. തിരുവനന്തപുരത്തുനിന്ന്​ ആരംഭിക്കുന്ന സർവിസ്​ സെപ്​റ്റംബർ 29 മുതലും കണ്ണൂരിൽനിന്നുള്ള സർവിസ്​ 30 മുതലും പുതിയ റേക്കുകളിൽ ഓടിത്തുടങ്ങും.

കോച്ചുകൾ കപൂർത്തലയിലെ റെയിൽ കോച്ച്​ ഫാക്ടറിയിൽനിന്ന്​ എത്തിക്കഴിഞ്ഞു. ജര്‍മന്‍ സാങ്കേതിക വിദ്യ ഉപയോഗിച്ചാണ് എല്‍.എച്ച്.ബി കോച്ച്​ പ്രവര്‍ത്തിക്കുന്നത്. വീതി കൂടിയ സീറ്റും കാൽ നീട്ടി വെക്കാനുള്ള സ്ഥല സൗകര്യവുമാണ് പ്രധാന ആകർഷണം. ഓരോ കോച്ചിലും ഉയർന്ന വേഗത്തിലും കാര്യക്ഷമമായ ബ്രേക്കിങ്ങിന് അഡ്വാൻസ്ഡ് ന്യൂമാറ്റിക് ഡിസ്ക് ബ്രേക്ക് സിസ്​റ്റം ഉണ്ട്. പരമ്പരാഗത കോച്ചുകൾ 100 ഡെസിബെൽ ശബ്​ദം പുറപ്പെടുവിക്കുമ്പോൾ എൽ.എച്ച്.ബിക്ക്​ പരമാവധി 60 ഡെസിബെൽ ശബ്​ദമേയുള്ളൂ.

വേണാട്​ അടക്കം ട്രെയിനുകൾ എൽ.എച്ച്​.ബിയിലേക്ക്​ മാറിയിട്ടും ജനശതാബ്​ദികൾ പരിഗണിക്കപ്പെട്ടിരുന്നില്ല. 10 വർഷത്തിലേറെ പഴക്കമുള്ള കോച്ചുകളുമായാണ്​ കണ്ണൂർ ജനശതാബ്​ദി ഓടുന്നത്​. കേരളത്തിൽ ആദ്യം തുടങ്ങിയ തിരുവനന്തപുരം-കോഴിക്കോട്​, കോഴിക്കോട്​-തിരുവനന്തപുരം ജനശതാബ്​ദികളും എൽ.എച്ച്​.ബിയിലേക്ക്​ മാറ്റണമെന്ന്​ ആവശ്യമുയർന്നിട്ടുണ്ട്​. ​

2009 ലാണ്​ കോഴിക്കോട്​ ജനശതാബ്​ദി ഓടിത്തുടങ്ങിയത്​. 25 വർഷമാണ്​ ഒരു കോച്ചിന്‍റെ കാലയളവായി റെയിൽവേ കണക്കാക്കുന്നത്​. ഇത്രയും വർഷം ഓടി​ക്കുമ്പോഴാണ്​ കോച്ചി​ന്‍റെ നിർമാണച്ചെലവ്​ ടിക്കറ്റ്​ വരുമാനത്തിൽനിന്ന്​ ലഭിക്കുക.

സുരക്ഷ മുൻനിർത്തിയാണ്​ സമയപരിധിയെത്തും മുമ്പേ​ കോച്ച്​ മാറ്റാൻ​ റെയിൽവേ തീരുമാനിച്ചത്​. തിരുവനന്തപുരം ഡിവിഷനിലെ 70 ശതമാനം ദീർഘദൂര സർവിസും എൽ.എച്ച്​.ബിയിലേക്ക്​ മാറിയിട്ടുണ്ട്​. ദക്ഷിണ റെയിൽവേയിൽ എൽ.എച്ച്​.ബി പരിഷ്കരണത്തിൽ ഒന്നാം സ്ഥാനത്താണ്​ തിരുവനന്തപുരം ഡിവിഷൻ