'മൂന്നുവർഷ ബി.ബി.എ ആറുമാസം കൊണ്ട്, പരീക്ഷയില്ല, വലയിലായത് നിരവധി വിദ്യാർഥികൾ'

കോട്ടയം: ഹ്രസ്വകാല കോഴ്​സുകളിലൂടെ ഉന്നത ബിരുദം നേടാമെന്ന്​ വിശ്വസിപ്പിച്ച് പണം തട്ടിയെടുത്തെന്ന പരാതിയിൽ കോട്ടയം കേന്ദ്രമായി പ്രവർത്തിച്ചിരുന്ന ഓൾ ഇന്ത്യ ഡിസ്​റ്റൻസ് എജുക്കേഷൻ (എയ്ഡ് ഇൻസ്​റ്റിറ്റ്യൂഷൻ) മാനേജിങ്​ ഡയറക്ടർമാർ അറസ്​റ്റിൽ.

മലപ്പുറം കോട്ടൂർ മങ്ങാട്ടുപുലം പുവല്ലൂർ ഷഷീഫ് (32), വെസ്​റ്റ്​ കോട്ടൂർ പിച്ചൻ കുന്നശ്ശേരി വീട്ടിൽ അബ്​ദുൽ ആഷിഫ് (32) എന്നിവരെയാണ് കോട്ടയം വെസ്​റ്റ്​ സ്​റ്റേഷൻ ഹൗസ് ഓഫിസർ ഇൻസ്‌പെക്ടർ എം.ജെ. അരുൺ അറസ്​റ്റ്​ ചെയ്തത്. മാസങ്ങളിലായി ഒളിവിലായിരുന്ന ഇവർ കോടതി നിർദേശപ്രകാരം പൊലീസിന്​ മുന്നിൽ ഹാജരാകുകയായിരുന്നു. കോട്ടയം നഗരമധ്യത്തിൽ സ്​റ്റാർ ജങ്​ഷൻ കേന്ദ്രീകരിച്ച് ഓൾ 'ഇന്ത്യ ഡിസ്​റ്റൻസ് എജുക്കേഷൻ' പേരിൽ സ്ഥാപനം നടത്തുകയായിരുന്നു.

തമിഴ്‌നാട്ടിലെ മധുര കാമരാജ് സർവകലാശാല അടക്കം വിവിധ സർവകലാശാലകളുടെ ഡിഗ്രി കോഴ്‌സുകൾ ഹ്രസ്വകാലയളവിൽ പാസാക്കി സർട്ടിഫിക്കറ്റുകൾ നൽകുമെന്നുപറഞ്ഞാണ് ഇവർ വിദ്യാർഥികളെ ആകർഷിച്ചിരുന്നത്. മധുര കാമരാജ് യൂനിവേഴ്‌സിറ്റിയുടെ മൂന്നുവർഷ ബി.ബി.എ സർട്ടിഫിക്കറ്റ് ആറുമാസം കൊണ്ട്​ നൽകാമെന്ന്​ വിശ്വസിപ്പിച്ച് കൊല്ലം സ്വദേശിയായ യുവാവിൽനിന്ന്​ 33,000 രൂപ ഫീസായി ഇവർ വാങ്ങിയെങ്കിലും വിദ്യാർഥിക്ക്​പരീക്ഷയെഴുതാനായില്ല.

ഇതേ സർവകലാശാലയിൽ രജിസ്​റ്റർ ചെയ്ത മറ്റൊരു വിദ്യാർഥിയുടെ ഹാൾടിക്കറ്റ് നമ്പർ വ്യാജമായി ഇവർ ഈ വിദ്യാർഥിക്ക്​ നൽകുകയായിരുന്നു. തുടർന്ന്​ തട്ടിപ്പിന് ഇരയായ വിദ്യാർഥി അന്വേഷിച്ചപ്പോൾ സർവകലാശാലയിൽ പേര് പോലും രജിസ്​റ്റർ ചെയ്തിട്ടില്ലെന്ന്​ കണ്ടെത്തി. ഇതോടെ വിദ്യാർഥി പരാതിയുമായി വെസ്​റ്റ്​ പൊലീസിനെ സമീപിക്കുകയായിരുന്നു. കോടതി നിർദേശത്തി​െൻറ അടിസ്ഥാനത്തിൽ പ്രതികളെ പിന്നീട് ജാമ്യത്തിൽവിട്ടു.

സംസ്ഥാനത്തി​െൻറ പലഭാഗങ്ങളിലും ഇവർക്ക്​ ശാഖകളുണ്ടെന്നും സമാനരീതിയിൽ തട്ടിപ്പ്​ നടന്നിരിക്കാമെന്നും പൊലീസ് പറഞ്ഞു. ഈ സ്ഥാപനത്തിൽ പഠിച്ചവർ സർട്ടിഫിക്കറ്റുകൾ പരിശോധനക്ക്​ വിധേയമാക്കണമെന്നും പൊലീസ് അറിയിച്ചു.