കാ​ളി​കാ​വിലെ നരഭോജി കടുവയെ പിടികൂടാൻ മൂന്ന് സംഘമായി തിരച്ചിൽ, ഒരു കു​ങ്കി​യാ​ന​ കൂടി ഇന്നെത്തും

കാ​ളി​കാ​വ്: ടാ​പ്പി​ങ് തൊ​ഴി​ലാ​ളി​യെ കൊ​ന്ന നരഭോജി കടുവയെ പിടികൂടാനുള്ള നടപടിയുമായി വനം വകുപ്പ്. ചീഫ് വെറ്റിനറി സർജൻ ഡോ. ​അ​രു​ൺ സ​ക്ക​റി​യയുടെ നേതൃത്വത്തിൽ 25 അം​ഗ​ ആ​ർ.​ആ​ർ.​ടി ടീ​മാണ് ദൗത്യത്തിലുള്ളത്. അ​ട​ക്കാ​കു​ണ്ട് ക്ര​സ​ന്റ് ഹ​യ​ർ സെ​ക്ക​ൻ​ഡ​റി സ്കൂ​ളി​ൽ ക്യാ​മ്പ് ചെ​യ്യു​ന്ന ആ​ർ.​ആ​ർ.​ടി ടീം ​മൂന്ന് സംഘമായി തിരിഞ്ഞ് തിരച്ചിൽ നടത്തും.

ക​ടു​വ ആ​ക്ര​മ​ണ​മു​ണ്ടാ​യ പ്ര​ദേ​ശ​ത്ത് 50ല​ധി​കം കാ​മ​റ​ക​ൾ സ്ഥാ​പി​ച്ച് നി​രീ​ക്ഷ​ണം തു​ട​ങ്ങി​യിട്ടുണ്ട്. ഇന്ന് ഡ്രോ​ൺ ഉ​പ​യോ​ഗി​ച്ചും നി​രീ​ക്ഷ​ണം ന​ട​ത്തും. സി.​സി.​എ​ഫ് ഒ.​ ഉ​മ, സൗ​ത്ത് ഡി.​എ​ഫ്.​ഒ ധ​നി​ക് ലാ​ൽ തു​ട​ങ്ങി​യ ഉ​ന്ന​ത വ​നം, പൊ​ലീ​സ് ഉ​ദ്യോ​ഗ​സ്ഥ​ർ സ്ഥ​ല​ത്ത് ക്യാ​മ്പ് ചെ​യ്യു​ന്നു​ണ്ട്.

ക​ടു​വ​യെ പി​ടി​കൂ​ടാ​ൻ കു​ങ്കി​യാ​ന​യെ​ വ​യ​നാ​ട്ടി​ൽ നി​ന്ന് പാ​റ​ശ്ശേ​രി ജി.​എ​ൽ.​പി സ്കൂ​ളി​ൽ എത്തിച്ചിട്ടുണ്ട്. ഇന്ന് ഒ​രു കു​ങ്കി​യാ​നയെ കൂ​ടി എ​ത്തിക്കും. ക​ടു​വ സാ​ന്നി​ധ്യം തി​രി​ച്ച​റി​ഞ്ഞാ​ൽ കു​ങ്കി​യാ​ന​യെ ഉ​പ​യോ​ഗി​ച്ച് ഇന്ന് രാ​വി​ലെ മു​ത​ൽ തി​ര​ച്ചി​ൽ തു​ട​ങ്ങു​മെ​ന്ന് അ​ധി​കൃ​ത​ർ അറിയിച്ചു.

അതേസമയം, ടാപ്പിങ്​ തൊഴിലാളിയെ കൊലപ്പെടുത്തിയ കടുവയെ മയക്കുവെടി വെച്ച്​ പിടിക്കുക ദുഷ്കരമാണെന്ന്​ ഈ വനമേഖല പരിചയമുള്ള വിദഗ്​ധർ പറയുന്നു. നിലമ്പൂർ, സൈലന്‍റ്​വാലി കാടുകളോട്​ ചേർന്നു കിടക്കുന്ന ചെങ്കുത്തായ വനപ്രദേശമാണിത്​. കണ്ണത്ത്​, പുല്ലങ്കോട്​ മലവാരങ്ങളുടെ തുടർച്ചയായി സൈലന്‍റ്​ വാലി ബഫർ സോണിന്​ ചേർന്നാണ്​ ഈ വനമേഖല.

ഇടതൂർന്ന്​ അടിക്കാടുകൾ വളർന്നു നിൽക്കുന്നതിനാലും കിഴുക്കാംതൂക്കായ മലഞ്ചരിവുകൾ ഉള്ളതിനാലും കടുവയെ പിന്തുടർന്ന്​ കണ്ടെത്തുക എളുപ്പമാവില്ല. ഇത്തരം സാഹചര്യങ്ങളിൽ മയക്കുവെടി വെക്കുന്നതും അപകടകരമായിരിക്കും. വെടിയേറ്റാലും മയങ്ങിവീഴാൻ സമയമെടുക്കും. ഈ സമയം കടുവ ആക്രമണകാരിയാകാനും സാധ്യതയുണ്ട്​.

കുങ്കിയാനകളെ വെച്ച്​ കടുവയെ ട്രാക്​ ചെയ്യുന്നത്​ കൂടുതൽ സുരക്ഷിതമാണെങ്കിലും ചെങ്കുത്തായ സ്ഥലങ്ങളിൽ മയക്കുവെടിവെക്കുക പ്രയാസമാകും. വെടിവെക്കുന്നതിനു​ മുമ്പ്​ സംഘത്തിലെ ഡോക്ടർമാർ തിരിച്ചറിയുകയും ആരോഗ്യസ്ഥിതി മനസ്സിലാക്കുകയും വേണം. കാട്ടിനുള്ളിൽ ആൾപെരുമാറ്റമുണ്ടായാൽ കടുവ ഉൾവനത്തിലേക്ക്​ മാറാനുള്ള സാധ്യതയേറെയാണ്​.

വനാതിർത്തിയിൽ കൂട്​ സ്ഥാപിച്ച്​ പിടിക്കാൻ ശ്രമിക്കുന്നതിനാണ്​ കൂടുതൽ വിജയസാധ്യതയെന്ന്​ വിദഗ്​ധർ പറയുന്നു. വെടിവെച്ച് കൊല്ലണമെന്നാണ്​ നാട്ടുകാരുടെ ആവശ്യമെങ്കിലും ഇതംഗീകരിക്കപ്പെട്ടില്ല. ജീവനോടെ പിടിക്കുന്നതിലാണ്​ സ്റ്റാൻഡേഡ്​ ഓപറേറ്റിങ് പ്രൊസീജിയർ (എസ്​.ഒ.പി) പ്രകാരം ​ചേർന്ന സമിതി തീരുമാനിച്ചത്​.