ചിലർ സമ്പന്നരായതിനാൽ ​ ന്യൂനപക്ഷ സമുദായാംഗങ്ങളെല്ലാം മുൻപന്തിയിലാണെന്ന്​ പറയാനാവി​ല്ലെന്ന്​ ഹൈകോടതി

കൊച്ചി: ന്യൂനപക്ഷ സമുദായത്തിലെ ചിലർ സമ്പന്നരാണെന്ന പേരിൽ ഈ സമുദായങ്ങളിലെ മുഴുവൻപേരും സാമ്പത്തികമായും സാമൂഹികമായും മുൻപന്തിയിലാണെന്ന്​ വിലയിരുത്താനാവില്ലെന്ന്​ ​ൈഹകോടതി.

ഇവരുടെ സമ്പന്നത ന്യൂനപക്ഷ വിഭാഗക്കാരായതാണെന്നതിനാലാ​െണന്ന്​​​ കരുതേണ്ടതില്ലെന്നും ചീഫ് ജസ്​റ്റിസ് എസ്. മണികുമാർ, ജസ്​റ്റിസ് ഷാജി പി. ചാലി എന്നിവരടങ്ങുന്ന ഡിവിഷൻ ബെഞ്ച് വ്യക്തമാക്കി. കേരളത്തിലെ മുസ്​ലിം, -ക്രിസ്ത്യൻ മത വിഭാഗങ്ങളുടെ ന്യൂനപക്ഷ പദവി പുനർ നിർണയിക്കണമെന്ന്​ ആവശ്യപ്പെട്ട് എറണാകുളം കേന്ദ്രമായ സിറ്റിസൺസ് അസോസിയേഷൻ ഫോർ ഡെമോക്രസി, ഇക്വാലിറ്റി, ട്രാൻക്വിലിറ്റി ആൻഡ്​ സെക്യൂലറിസം (കാഡറ്റ്സ്) എന്ന സംഘടന നൽകിയ പൊതുതാൽപര്യ ഹരജി തള്ളിയാണ്​ ഡിവിഷൻ ബെഞ്ചി​െൻറ നിരീക്ഷണം.

ന്യൂനപക്ഷമെന്നത് ഭരണഘടനയിൽ നിർവചിച്ചിട്ടില്ലെന്നും ന്യൂനപക്ഷ വിഭാഗങ്ങളിലെ മുഖ്യമന്ത്രിമാരുടെയും മന്ത്രിമാരുടെയും എണ്ണം പരിശോധിച്ചാൽ നിയമസഭയിലും ​പാർലമെൻറിലും മതിയായ പ്രാതിനിധ്യം ലഭിച്ചിട്ടു​ണ്ടെന്നുമായിരുന്നു ഹരജിക്കാരുടെ വാദം. മുസ്​ലിം, ക്രിസ്ത്യൻ വിഭാഗങ്ങളുടെ ന്യൂനപക്ഷ പദവി പുനർ നിർണയിക്കാൻ ദേശീയ ന്യൂനപക്ഷ കമീഷനോട്​ നിർദേശിക്കാൻ കേന്ദ്ര സർക്കാറിനോട്​ ഉത്തരവിടണമെന്നും ഹരജിക്കാർ ആവശ്യപ്പെട്ടു. തെരഞ്ഞെടുപ്പുകളിൽ വിജയിച്ച രാഷ്​ട്രീയ പാർട്ടികളും മുന്നണികളും ചേർന്നാണ് മുഖ്യമന്ത്രിയെയും മന്ത്രിമാരെയുമൊക്കെ തീരുമാനിക്കുന്നത്. ന്യൂനപക്ഷ പദവിയുമായി ഇതിന്​ ബന്ധവുമില്ല. ന്യൂനപക്ഷമെന്നത്​ ഭരണഘടനയിൽ നിർവചിച്ചിട്ടില്ലെന്ന പേരിൽ ​അവകാശങ്ങൾ നിഷേധിക്കാനാവില്ല. 1992ലെ ദേശീയ ന്യൂനപക്ഷ കമീഷൻ ആക്ട് പ്രകാരം കേന്ദ്രസർക്കാർ വിജ്ഞാപനം ചെയ്ത വിഭാഗങ്ങളാണ് ന്യൂനപക്ഷങ്ങൾ. ഇക്കാര്യം കേരള സ്​റ്റേറ്റ് കമീഷൻ ഫോർ മൈനോറിറ്റീസ് ആക്ടിലും വ്യക്തമാക്കിയിട്ടുണ്ട്​. അതിൽ വെള്ളം ചേർക്കാനാവില്ല. ചിലർ സമ്പന്നരായതുകൊണ്ട്​ ന്യൂനപക്ഷ അവസ്ഥ നിർണയിക്കാൻ ന്യൂനപക്ഷ കമീഷന്​ തടസ്സമല്ല.

കേന്ദ്ര സർക്കാറിന് ദേശീയ ന്യൂനപക്ഷ കമീഷനോട് നിർദേശിക്കാൻ നിയമപരമായി സാധ്യമല്ലെന്ന്​ കോടതി ചൂണ്ടിക്കാട്ടി. ചില കാര്യങ്ങളിൽ സർക്കാറിനെ ഉപദേശിക്കാനുള്ള അധികാരം കമീഷനുണ്ട്. നിയമപ്രകാരം കമീഷനുള്ള അധികാരങ്ങളും പ്രവർത്തനങ്ങളും സ്വതന്ത്ര സ്വഭാവത്തിലുള്ളതായതിനാൽ ഇടപെടുന്നതിൽ കേന്ദ്ര, സംസ്ഥാന സർക്കാറുകൾക്ക് വിലക്കുണ്ടെന്ന്​ ഡിവിഷൻ ബെഞ്ച് വ്യക്തമാക്കി.