സഹകരണ മന്ത്രാലയം; കേന്ദ്ര നടപടിക്കെതിരെ കേരളം രംഗത്ത്

തിരുവനന്തപുരം: സഹകരണ മന്ത്രാലയം രൂപീകരിച്ച കേന്ദ്ര സർക്കാറിന്‍റെ നടപടിക്കെതിരെ കേരളം രംഗത്ത്​. മന്ത്രി വി.എൻ വാസവൻ കേന്ദ്ര നിലപാടിനെ വിമർശിച്ച്​ രംഗത്തെത്തി. മന്ത്രി സഭാപുനസംഘടനയിലാണ്​ ആഭ്യന്തരമന്ത്രി അമിത്‌ ഷായ​ുടെ കീഴിൽ​ സഹകരണ മന്ത്രാലയം രൂപീകരിച്ചത്​.

പല വിഷയങ്ങളിലെന്ന പോലെ സംസ്ഥാന സർക്കാറുകളുടെ അധികാര പരിധിയിലേക്കുള്ള കടന്ന്​ കയറ്റമായാണ് സംസ്ഥാനം​ ഇതിനെ നോക്കി കാണുന്നത്​. ഫെഡറൽ സംവിധാനത്തിനെതിരായിട്ടുള്ള വെല്ലുവിളിയാണിതെന്നും മന്ത്രി കുറ്റപ്പെടുത്തി.

ബാങ്കിങ്​ മേഖലയിൽ ഭേദഗതി വരുത്താനുള്ള അധികാ​​രം കേന്ദ്രസർക്കാറിനാണുള്ളത്​. എന്നാൽ സഹകരണം ​എന്നത്​ ​സംസ്ഥാന പരിധിയിലുള്ളതാണെന്ന്​ അദ്ദേഹം തിരുവനന്തപുരത്ത്​ മാധ്യമങ്ങളോട്​ പറഞ്ഞു. സഹകരണ രംഗത്ത്​ കേന്ദ്രം ഇങ്ങനെയൊരു കടന്ന്​ കയറ്റം നടത്തുന്നത്​ ശരിയല്ല. സംസ്ഥാനങ്ങളുമായി ഒരു കൂടി​യാലോചന എങ്കിലും നടത്തേണ്ട കാ​ര്യമായിരുന്നു ഇത്​. എന്തായാലും നിലവിൽ കേന്ദ്രത്തിന്​ ഇടപെട്ട്​ അതിലൊന്നും ചെയ്യാനാകില്ലെന്നും അദ്ദേഹം പറഞ്ഞു. മന്ത്രാലയത്തിന്‍റെ പ്രവർത്തന രീതി നോക്കിയ ശേഷം കൂടുതൽ പ്രതികരിക്കാമെന്നും മന്ത്രി കൂട്ടിച്ചേർത്തു.

സഹകരണ മന്ത്രാലയ രൂപീകരണത്തിലൂടെ മോദിസർക്കാർ ലക്ഷ്യമിടുന്നത്‌ കേരളത്തെയാണെന്ന്​ ഇടത്​ കേന്ദ്രങ്ങൾ നേരത്തെ പ്രതികരിച്ചിരുന്നു. സംസ്ഥാനത്തെ രണ്ടര ലക്ഷം കോടി രൂപയുടെ സഹകരണ നിക്ഷേപമാണ്‌ ഉന്നം. ജനാധിപത്യത്തെ മറികടന്നാണ്‌ സംസ്ഥാനങ്ങളുടെ അവകാശത്തിലേക്ക്​ കേന്ദ്രം കടന്നുകയറുന്നതെന്ന്​ ആക്ഷേപം ഉയർന്നിട്ടുണ്ട്​.

ഗുജറാത്തിലെ സഹകരണ ബാങ്കുകൾ കോൺഗ്രസിൽ നിന്ന്‌ ബി.ജെ.പി പിടിച്ചെടുത്തത്‌ അമിത് ഷായുടെ നേതൃത്വത്തിലായിരുന്നുവെന്ന്​ മുൻ മന്ത്രി തോമസ്​ ഐസക് നേരത്തെ​ പ്രതികരിച്ചിരുന്നു. ധവള വിപ്ലവത്തിന്‍റെ പിതാവ്‌ വർഗീസ്‌ കുര്യനെ പാൽ സഹകരണമേഖലയിൽനിന്ന്‌ പുകച്ച്‌ പുറത്തുചാടിച്ചതും ബി.ജെ.പി യാണെന്നും അദ്ദേഹം ഓർമിപ്പിച്ചു.