വ്യാപാരസ്ഥാപനങ്ങൾക്ക്​ പാർക്കിങ്​ ഫീ വാങ്ങാൻ വ്യവസ്ഥയില്ലെന്ന്​ മന്ത്രി; 'അനധികൃതമായി ഫീസ്​ ഈടാക്കുന്നത്​ അറിയില്ല'

തിരുവനന്തപുരം: വാണിജ്യാവശ്യങ്ങൾക്കായി നിർമ്മിച്ച കെട്ടിടങ്ങളുടെ പാർക്കിങ്​​ എരിയകളിൽ നിന്ന്​ പാർക്കിങ്​ ഫീസ്​ ഇൗടാക്കാൻ വ്യവസ്ഥ ചെയ്​തിട്ടില്ലെന്ന്​ മന്ത്രി എം.വി​ ഗോവിന്ദൻ.

കേരളത്തിൽ ഷോപ്പിങ്​​ മാളുകൾ അടക്കമുള്ള കെട്ടിടങ്ങൾ ചട്ടം ലംഘിച്ച്​ പണം പിരിക്കുന്നുവെന്നും, ഇത്തരത്തിൽ പാർക്കിങ്​ ഫീസ്​ ഈടാക്കാൻ ചട്ടങ്ങളിൽ ഇളവ്​ നൽകിയിട്ടു​ണ്ടോ എന്ന്​ എൻ.ഷംസുദ്ദീൻ എം.എൽ.എ ഉന്നയിച്ച ചോദ്യത്തിനാണ്​ തദ്ദേശ സ്വയംഭരണ വകുപ്പ്​ മന്ത്രി രേഖാമൂലം​ മറുപടി നൽകിയത്​.

2019 ലെ കേരളാ പഞ്ചായത്ത്​ ബിൽഡിങ്​ റൂൾസിൽ, റൂൾ 29 ൽ വ്യവസ്ഥ ചെയ്​തിരിക്കുന്ന പ്രകാരം വാണിജ്യാവശ്യങ്ങൾക്ക്​ വേണ്ടി നിർമ്മിക്കുന്ന കെട്ടിടങ്ങൾക്ക്​ വാഹന പാർക്കിങ് സംവിധാനം നിർബന്ധമാക്കിയിട്ടുണ്ട്​.

ഇപ്രകാരം നിർമിക്കുന്ന കെട്ടിടങ്ങൾ മേൽ ചട്ടങ്ങളിൽ ഒന്നും തന്നെ പാർക്കിങ്​ എരിയകളിൽ വാഹനങ്ങളിൽ നിന്നും പാർക്കിങ്​ ഫീസ്​ ഇൗടാക്കാൻ വ്യവസ്ഥ ചെയ്​തിട്ടില്ലെന്നും മന്ത്രി നിയമസഭയിൽ രേഖാമൂലം നൽകിയ മറുപടിയിൽ പറയുന്നു.

സംസ്ഥാനത്ത്​ ഇത്തരത്തിൽ വാഹനപാർക്കിംഗ്​ ഫീസ്​ ഈടാക്കുന്ന വൻകിട വ്യാപാരസ്ഥാപനങ്ങളും മാളുകളും സംബന്ധിച്ച്​ സർക്കാരിന്​ വിവരം ലഭിച്ചിട്ടുണ്ടോ എന്ന ചോദ്യത്തിന്​ 'സർക്കാറിന്‍റെ ശ്രദ്ധയിൽപ്പെട്ടിട്ടില്ല' എന്നാണ്​ മന്ത്രി മറുപടി നൽകിയിരിക്കുന്നത്​.

സംസ്ഥാനത്ത് മാളുകൾ,ആശുപത്രികൾ തുടങ്ങി പലയിടങ്ങളിലും ചട്ടം ലംഘിച്ച്​ വാഹന പാർക്കിങ്​​ ഫീസ്​ ഇൗടാക്കുന്നതായി പരാതികൾ ഉണ്ട്​.