മന്ത്രി ശശീ​​ന്ദ്രന്‍റെ ആരോഗ്യനില തൃപ്തികരം; രണ്ട്​ ദിവസം കൂടി നിരീക്ഷണത്തിൽ

തിരുവനന്തപുരം: രക്തസമ്മർദത്തിലെ വ്യതിയാനത്തെ തുടർന്ന്​ മെഡിക്കൽ കോളജ്​ ആശുപത്രിയിൽ പ്രവേശിപ്പിച്ച മന്ത്രി എ.കെ. ശശീ​ന്ദ്രന്‍റെ ആരോഗ്യനില തൃപ്​തികരം. നിലവിൽ​ ഐ.സി.യുവിലുള്ള ശശീന്ദ്രനെ ഞായറാഴ്ച​ രാത്രിയോ തിങ്കളാഴ്ചയോ മുറിയിലേക്ക്​ മാറ്റും. എങ്കിലും രണ്ടു ദിവസത്തെ നിരീക്ഷണം വേണമെന്നാണ്​ ​ഡോക്​ടർമാരുടെ നിർദേശം. മരുന്നുകളും തുടരണം.

രക്തസമ്മർദം ഉയരുകയും വേഗം താഴുകയും ​ക്ഷീണവും തളർച്ചയും അനുഭവപ്പെടുകയും ചെയ്തതിനെ തുടർന്നാണ്​​ മന്ത്രിയെ ആദ്യം പത്തനംതിട്ട ജനറൽ ആശുപത്രിയിലും പിന്നീട്​ ​തിരുവനന്തപുരം മെഡിക്കൽ കോളജ്​ ആശുപത്രിയിലും പ്രവേശിപ്പിച്ചത്​. നിലവിൽ രക്തസമ്മർദം സാധാരണ നിലയിലായിട്ടുണ്ട്​. ഇതു ഉറപ്പുവരുത്തുന്നതിനാണ്​ രണ്ടു​ ദിവസത്തെ പൂർണ വിശ്രമവും നിരീക്ഷണവും ​ഡോക്ടർമാർ നിഷ്കർഷിച്ചിരിക്കുന്നത്​.

ഒരുമാസമായി മന്ത്രി നവകേരള സദസ്സിനൊപ്പമുണ്ട്​. തുടർച്ചയായ യാത്രയായതിനാൽ ഭക്ഷണം, ഉറക്കം, വിശ്രമം എന്നിവ​യിലെല്ലാം വിട്ടുവീഴ്ച ചെയ്യേണ്ടി വന്നിരുന്നു. ഇതാണ്​ ആരോഗ്യപ്രശ്നത്തിന്​ കാരണമായതെന്നാണ്​ വിവരം. കടുത്തുരുത്തിയിൽ 45 മിനിറ്റോളം പ്രസംഗിക്കുകയും​ ചെയ്തിരുന്നു.