ആവശ്യക്കാരില്ല; ബുധനാഴ്​ച മലബാറിൽ മിൽമ പാൽ സംഭരിക്കില്ല

കോഴിക്കോട്​: കോവിഡി​​െൻറ പശ്​ചാത്തലത്തിൽ പ്രതിസന്ധിയിലായ മിൽമ മലബാർ മേഖല യൂനിയൻ ബുധനാഴ്​ച ക്ഷീരസംഘങ്ങൾ മുഖേന പാൽ സംഭരിക്കില്ല. സംഭരിക്കുന്ന പാലിന്​ ആവശ്യക്കാരില്ലാത്തതിനെ തുടർന്നാണ്​ തീരുമാനം. വ്യാഴാഴ്​ച മുതൽ ക്ഷീരസംഘങ്ങൾ മിൽമയിലേക്ക്​ അയക്കുന്ന പാലി​​െൻറ അളവിൽ കുറവ്​ വരുത്തണമെന്നും മലബാർ മേഖല യൂണിയൻ അറിയിച്ചു.

മലബാറിലെ പ്രതിദിന പാൽസംഭരണം ആറ്​ ലക്ഷം ലിറ്ററാണ്​. മൂന്ന്​ ലക്ഷം ലിറ്റർ മാത്രമാണ്​ വിറ്റുപോകുന്നത്​. രണ്ട്​ ലക്ഷം ലിറ്റർ പാൽ തമിഴ്​നാട്ടിലടക്കം എത്തിച്ച്​ പാൽപ്പൊടിയാക്കാറുണ്ടായിരുന്നു. എന്നാൽ, കേരളത്തിൽ നിന്നുള്ള വാഹനങ്ങൾക്ക്​ തമിഴ്​നാട്​ കർശന നിയന്ത്രണമേർപ്പെടുത്തിയിട്ടുണ്ട്​. കേരളത്തിലെ പാൽ​ വേണ്ടെന്ന്​ തമിഴ്​നാട്​ മിൽക്ക്​ മാർക്കറ്റിങ്​ ഫെഡറേഷൻ (ആവിൻ) അറിയിച്ചിരുന്നു. സംസ്​ഥാന സർക്കാർ സമ്മർദം ചെലുത്തിയിട്ടും ’ആവിൻ’ നിലപാട്​ മാറ്റിയിട്ടില്ല.

കഴിഞ്ഞ ദിവസങ്ങളിൽ വിപണനം ശക്​തമാക്കി പ്രതിസന്ധി മറികടക്കാൻ ചില നീക്കങ്ങൾ മിൽമ നടത്തിയിരുന്നു. നഗരങ്ങളിൽ പാൽ വീടുകളിലെത്തിച്ചും ഡീലർമാർക്ക്​ പ്രോത്സാഹനമേകിയും ഏറെ നാൾ കേട്​വരാതെ സൂക്ഷിക്കാവുന്ന പാലി​​െൻറ വിപണനം വർധിപ്പിക്കാനുമുള്ള ശ്രമങ്ങൾ വിജയമായിരുന്നില്ല. മലബാർ യൂനിയ​​െൻറ മിച്ചമുള്ള പാലിൽ ഒരുഭാഗം തിരുവനന്തപുരം യൂനിയൻ വാങ്ങിയിരുന്നു. നിലവിൽ അവർക്കും പാലി​​െൻറ ആവശ്യം കുറയുകയാണ്​. കർഷകർ പശുക്കൾക്ക്​ നൽകുന്ന തീറ്റ കുറച്ച്​ ഉത്​പാദനം കുറക്കണമെന്ന്​ ​ മലബാർ യൂനിയൻ കർഷകരോട്​ അഭ്യർഥിച്ചു.