ബീഹാറിലേക്ക്​ ട്രെയിനെന്ന്​ അഭ്യൂഹം; എറണാകുളത്തെത്താൻ​ ട്രാക്കിലൂടെ നടന്ന്​ അന്തര്‍ സംസ്ഥാന തൊഴിലാളികള്‍

ചങ്ങനാശ്ശേരി: നാട്ടിലേക്ക്​ മടങ്ങാന്‍ ട്രെയിന്‍ വേണമെന്ന് ആവശ്യപ്പെട്ട് 16 അന്തര്‍ സംസ്ഥാന തൊഴിലാളി സംഘം പത്തനംതിട്ട ജില്ലയില്‍നിന്ന്​ റെയില്‍വേ ട്രാക്കിലൂടെ നടന്ന് ചങ്ങനാശ്ശേരിയിലെത്തി. പത്തനംതിട്ട ജില്ലയിലെ തിരുവല്ല-വെണ്ണിക്കുളം ഭാഗങ്ങളിലെ ക്യാമ്പുകളില്‍ താമസിക്കുന്ന ബിഹാര്‍ സ്വദേശികളാണ്  ട്രാക്കിലൂടെ നടന്ന് ബുധനാഴ്ച ഉച്ചക്ക്​ രണ്ടരയോടെ ചങ്ങനാശ്ശേരി റെയില്‍വേ സ്‌റ്റേഷനില്‍ എത്തിയത്.

സംഘം ചേര്‍ന്ന് തൊഴിലാളികള്‍ ട്രാക്കിലൂടെ നടന്നുവരുന്നത്​ കണ്ട റെയില്‍വേ സ്​റ്റേഷനിലെ ജീവനക്കാരും റെയില്‍വേ പൊലീസും ഇവരോട് ട്രാക്കില്‍നിന്ന് മാറാന്‍ ആവശ്യപ്പെട്ടു. ട്രാക്കില്‍നിന്ന് കയറി സമീപത്തെ ബൈപാസിലെത്തിയതോടെ വിവരം ആരോ പൊലീസിൽ അറിയിച്ചു. എറണാകുളത്തെത്തിയാല്‍ നാട്ടിലേക്ക് മടങ്ങാൻ സൗജന്യ ട്രെയിന്‍ ലഭിക്കുമെന്ന് ആരോ പറഞ്ഞതുകേട്ട് ഇറങ്ങിത്തിരിച്ചതാണ്​ തൊഴിലാളിസംഘമെന്ന് പൊലീസ് പറഞ്ഞു. തൊഴിലാളികളെ കീഴ്‌വായ്പ്പൂര് പൊലീസ് സ്​റ്റേഷനിലെത്തിച്ച്​ ഇവര്‍ താമസിച്ചിരുന്ന തിരുവല്ല-വെണ്ണിക്കുളം ക്യാമ്പുകളിലേക്ക് തിരിച്ചയച്ചു.