ഉച്ചഭക്ഷണ പദ്ധതി: നിലവിലെ നിരക്ക്​ തികയാതെ വന്നാൽ എന്തു​ചെയ്യുമെന്ന്​ ഹൈകോടതി

കൊച്ചി: സ്കൂൾ ഉച്ചഭക്ഷണ പദ്ധതിക്കായി അരി ഒഴികെ ഒരുകുട്ടിക്ക് എട്ടുരൂപയെന്ന നിരക്ക്​ തികയാതെവന്നാൽ എന്ത്​ ചെയ്യുമെന്ന്​ ഹൈകോടതി. ഇതിൽ സംസ്ഥാന സർക്കാറിനോട്​ വിശദീകരണം ആവശ്യപ്പെട്ട ജസ്റ്റിസ്​ ടി.ആർ. രവി, കേന്ദ്രവിഹിതം സംസ്ഥാനം മുൻകൂറായി അനുവദിച്ചാൽ തുക നൽകാൻ പിന്നീട്​ നിയമ തടസ്സമുണ്ടോയെന്ന കാര്യം വിശദീകരിക്കാൻ കേന്ദ്ര സർക്കാറിനോടും നിർദേശിച്ചു. പദ്ധതിയുടെ കുടിശ്ശിക ലഭിക്കാൻ പ്രധാനാധ്യാപകർ നൽകിയ ഹരജിയിൽ ഈ തുക പര്യാപ്തമല്ലെന്ന വാദം ഉയർന്നതോടെയാണ്​ കോടതിയുടെ ഇടപെടൽ​.

ഫണ്ടില്ലെങ്കിൽ സ്കൂളിന്‍റെയോ പി.ടി.എയുടേയോ ഫണ്ട്​ ഇതിനായി ഉപയോഗിക്കാനും ഈ തുക പിന്നീടു നൽകുമെന്നും വ്യക്തമാക്കിയിട്ടുണ്ടെന്ന്​ സർക്കാറിനുവേണ്ടി ഹാജരായ സ്പെഷൽ ഗവ. പ്ലീഡർ ​അറിയിച്ചു. ഒട്ടേറെ കുട്ടികൾക്ക് പ്രയോജനകരമായ പദ്ധതി സർക്കാറിന്‍റെ അഭിമാനമാണ്. സെപ്​റ്റംബർ 30 വരെയുള്ള ഫണ്ട് ഇതിനകം നൽകിയിട്ടുണ്ട്​. ഹരജിക്കാരടക്കമുള്ളവർ യഥാസമയം ബിൽ നൽകി തുക കൈപ്പറ്റിയിട്ടില്ല.

അധ്യാപകർ സ്വന്തം പണമെടുത്ത്​ ചെലവാക്കിയതിന് തെളിവില്ല. അരി സർക്കാർ നൽകും. ബാക്കിയുള്ളവ വാങ്ങാനാണ് എട്ടുരൂപ നിരക്കിൽ നൽകുന്നതെന്നും സർക്കാർ വാദിച്ചു. എന്നാൽ, പാചക വാതകമടക്കമുള്ളവക്ക്​ ഈ തുക തികയില്ലെന്ന് ഹരജിക്കാരുടെ അഭിഭാഷകൻ വ്യക്തമാക്കി. ഇതിനുപുറമെ മുട്ടക്കും പാലിനും പണം കണ്ടെത്തേണ്ടതുണ്ട്​. ഇതിന് സ്കൂൾ, പി.ടി.എ ഫണ്ട്​ ഉപയോഗിക്കാനാവുമെന്ന് സർക്കാർ മറുപടി നൽകി. ഇത്തരം ഫണ്ടുകൾ എത്രവരുമെന്ന് ചോദിച്ച കോടതി, ആർക്കും ഭാരമാകാതെ പദ്ധതി നടപ്പാക്കുന്നത്​ സംബന്ധിച്ചാണ്​ പരിശോധിക്കുന്നതെന്നും വ്യക്തമാക്കി​.

ഉച്ചഭക്ഷണ പദ്ധതിക്ക് തുക മുൻകൂർ അനുവദിക്കുക, കുടിശ്ശിക നൽകുക തുടങ്ങിയ ആവശ്യങ്ങളുന്നയിച്ച് കേരള പ്രദേശ് സ്‌കൂൾ ടീച്ചേഴ്‌സ് അസോസിയേഷനും കേരള പ്രൈവറ്റ് പ്രൈമറി ഹെഡ്‌മാസ്‌റ്റേഴ്‌സ് അസോസിയേഷനും നൽകിയ ഹരജികളാണ് കോടതിയുടെ പരിഗണനയിലുള്ളത്. ഹരജി തുടർന്ന്​ ഒക്ടോബർ 26ന്​ പരിഗണിക്കാൻ മാറ്റി.