മൈക്രോ ഫിനാൻസ് തട്ടിപ്പ്: പ്രതികൾക്ക് രേഖകൾ നൽകരുതെന്ന് വിജിലൻസ്

കൊച്ചി: മൈക്രോ ഫിനാൻസ് തട്ടിപ്പുമായി ബന്ധപ്പെട്ട് കേസിൽ പ്രതികൾക്ക് രേഖകൾ നൽകരുതെന്ന് വിജിലൻസ് ഹൈകോടതിയിൽ അറിയിച്ചു. പ്രതികൾക്ക് തെളിവുകളുടെ പകർപ്പ് നൽകുന്നത് അന്വേഷണത്തെ ബാധിക്കും. കേസിൽ അന്വേഷണം മുന്നോട്ട് പോകുകയാണ്. ഇൗ ഘട്ടത്തിൽ തെളിവുകളുടെ പകർപ്പ് നൽകാൻ നിർബന്ധിക്കരുതെന്നും വെള്ളാപള്ളി നടേശനെതിരായ കേസ്​ റദ്ദാക്കരുതെന്നും വിജിലൻസ്​ ഹൈകോടതിയെ അറിയിച്ചു. 

 കേസിൽ അന്വേഷണ പുരോഗതി റിപ്പോർട്ട് നൽകാൻ വിജിലൻസ് കൂടുതൽ സമയം ആവശ്യപ്പെട്ടു. എന്നാൽ സമയം നീട്ടി നൽകാൻ ആവില്ലെന്ന് കോടതി വ്യക്തമാക്കി. തുടർന്ന്​ ഇടക്കാല അന്വേഷണ പുരോഗതി റിപ്പോർട്ട് വിജിലൻസ് കോടതിയിൽ നൽകി.

തനിക്കെതിരെയുള്ള  കേസ് റദ്ദാക്കണമെന്ന് ആവശ്യപ്പെട്ടാണ്​ വെള്ളാപള്ളി നടേശൻ ഹൈകോടതിയിൽ ഹരജി നൽകിയത്​. എന്നാൽ വെള്ളാപ്പള്ളിക്കെതിരായ കേസ് റദ്ദാക്കരുതെന്നാണ് വിജിലൻസിന്‍റെ നിലപാട്.

കെ.എസ്.എഫ്.ഡി.സിയിൽ നിന്നും മാനദണ്ഡങ്ങൾ മറികടന്നു മൈക്രോ ഫിനാൻസിനായി ലോൺ തരപ്പെടുത്തിയെന്ന മുൻ മുഖ്യമന്ത്രി വി.എസ് അച്യുതാനന്ദന്‍റെ പരാതിയിൽ രജിസ്ടർ ചെയ്ത കേസ് റദ്ദാക്കണമെന്നാണ് വെള്ളാപ്പള്ളിയുടെ ഹരജിയിലെ ആവശ്യം.